სოციალური სამართლიანობის ცენტრი: პარლამენტმა 300 საკანონმდებლო ინიციატივა მიიღო – უმეტესობა დაჩქარებული წესით იქნა მიღებული

„სოციალური სამართლიანობის ცენტრმა“ 2024 წლის ნოემბრიდან 2026 წლის ივნისამდე საქართველოს პარლამენტში მიმდინარე საკანონმდებლო პროცესები შეაფასა. 24News.ge-ის ინფორმაციით, ორგანიზაციის მიერ მომზადებულ ანგარიშში აღნიშნულია, რომ ამ პერიოდში პარლამენტმა დაახლოებით 300 საკანონმდებლო ინიციატივა და კანონპროექტთა პაკეტი მიიღო. ორგანიზაციის განცხადებით, მათი უმრავლესობა შინაარსობრივი განხილვის გარეშე, დაჩქარებული წესით იქნა მიღებული და უარყოფითი გავლენა მოახდინა ადამიანის უფლებების დაცვაზე, სახელმწიფო ინსტიტუტების დემოკრატიულ ფუნქციონირებასა და პოლიტიკურ-სამართლებრივ სისტემაზე. ცენტრის შეფასებით, 2024 წლის საპარლამენტო არჩევნების შემდეგ, პოლიტიკური კრიზისის, მასობრივი საპროტესტო აქციების, ოპოზიციური პარტიების უმრავლესობის მიერ პარლამენტის ბოიკოტისა და ევროპული ინტეგრაციის პროცესის შეჩერების ფონზე, პარლამენტი ფაქტობრივად ერთპარტიული შემადგენლობით ფუნქციონირებდა. ორგანიზაციის განცხადებით, საანგარიშო პერიოდში მიღებული ცვლილებები ასახავდა საერთო პოლიტიკურ-სამართლებრივ მიდგომას, რომელიც გულისხმობდა ადამიანის უფლებების შეზღუდვას, სახელმწიფო ინსტიტუტების რეორგანიზაციას, აღმასრულებელი ხელისუფლების გავლენის გაფართოებას და დემოკრატიული ინსტიტუტების შესუსტებას. „სოციალური სამართლიანობის ცენტრმა“ ასევე აღნიშნა, რომ უფლებების შემზღუდველი საკანონმდებლო ინიციატივების დასაბუთებისას გამოიყენებოდა პოპულისტური, ფსევდოლოგიური და ანტიდასავლური რიტორიკა, ასევე წინა ხელისუფლების წინააღმდეგ მიმართული პოლიტიკური არგუმენტები.

www.24news.ge

სხვა სიახლეები