მაღალსართულიანი შენობების სახურავებზე ვერტმფრენის მოედნების მოწყობა სავალდებულო გახდება

საქართველოში შენობებისა და ნაგებობების უსაფრთხოებასთან დაკავშირებული ზოგიერთი ახალი რეგულაციის ამოქმედება 2027 წლის 1 მარტამდე გადაიდო. 24News.ge-ის ინფორმაციით, მთავრობის 41 დადგენილებაში შეტანილი ცვლილებით, გარკვეული ობიექტებისთვის ახალი ნორმების ამოქმედების შეჩერების ვადა 2027 წლის 1 მარტამდე გახანგრძლივდა. ეს შეღავათი ვრცელდება იმ ნაგებობებზე, რომლებიც „სამოქალაქო უსაფრთხოების შესახებ“ კანონით განსაზღვრულ სახელმწიფო სახანძრო ზედამხედველობის ობიექტებს არ მიეკუთვნება. გადავადება ძირითადად ეხება სახანძრო-სამაშველო ტექნიკის შენობებთან მისასვლელ გზებს, ასევე მაღალსართულიან შენობებში სამაშველო მოედნების მოწყობასთან დაკავშირებულ მოთხოვნებს. ახალი ნორმების თანახმად, ქალაქთმშენებლობითი ან დეტალური ქალაქთმშენებლობითი გეგმის მომზადებისას, ასევე მშენებლობის ნებართვის გაცემის პროცესის საწყისი ეტაპიდანვე, წინასწარ უნდა იყოს გათვალისწინებული სპეციალური ტექნიკის გადაადგილება და შენობებთან მისასვლელი გზები. ეს მოთხოვნა ინდივიდუალურ საცხოვრებელ სახლებზე არ ვრცელდება. გარდა ამისა, 75 მეტრზე მეტი სიმაღლის შენობების სახურავზე ვერტმფრენის საშუალებით ადამიანების ევაკუაციისთვის გათვალისწინებულია სულ მცირე ერთი სახანძრო-სამაშველო მოედნის მოწყობა. მოედნები დადგენილ ტექნიკურ მოთხოვნებს უნდა აკმაყოფილებდეს. აღსანიშნავია, რომ მთავრობის №41 დადგენილება განსაზღვრავს შენობებისა და ნაგებობების უსაფრთხოებასთან, მათ შორის, ხანძრის დროს ადამიანების ევაკუაციასა და სამაშველო სამსახურების საქმიანობის უზრუნველყოფასთან დაკავშირებულ მოთხოვნებს.

www.24news.ge

მაღალსართულიანი შენობების სახურავებზე ვერტმფრენის მოედნების მოწყობა სავალდებულო გახდება

სხვა სიახლეები