Gürcüstanda avtomobillər üçün icbari sığorta sistemi tətbiq oluna bilər

Gürcüstanda avtomobil sahiblərinin mülki məsuliyyətinin icbari sığortalanması sistemi tətbiq oluna bilər. 24News.ge xəbər verir ki, bu barədə hökumətin 2026-cı ilin payız sessiyası üçün hazırladığı qanunvericilik fəaliyyətinin qısamüddətli planında qeyd olunub. Hökumətin planına görə, müvafiq qanun layihəsinin parlamentə təqdim edilməsi nəzərdə tutulur. Sənəddə bildirilir ki, yol-nəqliyyat hadisələrinin yaratdığı yüksək xərclərin qarşılanması probleminin sistemli şəkildə həlli üçün avtomobil sahiblərinin mülki məsuliyyətinin icbari sığortalanması mexanizminin tətbiqi təklif olunur. Yeni sistem çərçivəsində yol-nəqliyyat hadisəsi nəticəsində zərər çəkən şəxsin qanunla müəyyən edilmiş həddə kompensasiya alması nəzərdə tutulur. Bu, qəzanın sığortasız və ya müəyyən edilməmiş avtomobil tərəfindən törədildiyi hallara da şamil ediləcək. Hökumətin planında qeyd olunur ki, sistemin yaradılması üçün hər bir avtomobil sahibi icbari sığorta polisi əldə etməli və sığorta haqqı ödəməlidir. Təşəbbüs həmçinin Gürcüstanın qanunvericiliyinin Avropa İttifaqı qanunvericiliyinə yaxınlaşdırılması ilə bağlı öhdəlikləri ilə əlaqələndirilir. Sənəddə 2009/103/EC saylı Aİ direktivinin tələblərinə uyğunlaşmanın nəzərdə tutulduğu bildirilir. Qeyd edək ki, Gürcüstanda avtomobil sahiblərinin mülki məsuliyyətinin icbari sığortası ilə bağlı qanunvericilik daha əvvəl də mövcud olub.

www.24news.ge

Gürcüstanda avtomobillər üçün icbari sığorta sistemi tətbiq oluna bilər

Digər xəbərlər