Tramp administrasiyası İranla müharibədən sonrakı Yaxın Şərq strategiyası hazırlayır

ABŞ Prezidenti Donald Trampın administrasiyası İranı çəkindirməyə və İsrail ilə region ölkələri arasında münasibətlərin normallaşdırılmasına yönəlmiş müharibədən sonrakı strategiya üzərində işləyir. 24News.ge xəbər verir ki, bu barədə ABŞ hökümətinə yaxın Axios məlumatlı mənbələrə istinadən yazıb. Məlumata görə, plan hələ hazırlıq mərhələsindədir. Məqsəd İranla müharibə başa çatdıqdan sonra və Trampın prezidentlik müddətinin son iki ilində ABŞ-ın Yaxın Şərq siyasətini müəyyənləşdirməkdir. ABŞ rəsmilərinin sözlərinə görə, strategiya üzərində iş həm Tramp administrasiyasının yüksək siyasi səviyyəsində, həm də müxtəlif dövlət qurumlarının işçi səviyyəsində aparılır. Son həftələrdə Trampın yüksək səviyyəli müşavirləri ilə iki görüş keçirdiyi və burada strategiyanın müzakirə edildiyi bildirilir. Mənbələrin məlumatına görə, Tramp şəxsi söhbətlərində İranla müharibədən sonra Yaxın Şərqdə “daha böyük bir şey” üzərində işlədiyini bildirib. Strategiyanın mümkün əsas istiqamətləri arasında İranı çəkindirmək üçün ABŞ-ın müttəfiqləri arasında regional birlik yaradılması, 2023-cü il 7 oktyabr hücumlarının regional nəticələrinin aradan qaldırılması üçün səylərin koordinasiyası və Trampın Qəzza planının növbəti mərhələsinin həyata keçirilməsi nəzərdən keçirilir. Bundan əlavə, İsrail-Suriya arasında təhlükəsizlik razılaşmasının əldə olunması, İsrail-Livan razılaşmasının həyata keçirilməsi, “İbrahim sazişləri”nin genişləndirilməsi və Səudiyyə Ərəbistanı ilə İsrail arasında münasibətlərin normallaşdırılması barədə razılaşmanın əldə edilməsi də mümkün planın tərkib hissələri kimi müzakirə olunur. Mənbələrdən biri strategiyanın hazırlanmasının daha bir neçə həftə çəkəcəyini bildirib. Onun sözlərinə görə, məqsəd regionda mövcud olan müxtəlif məsələləri bir strategiyada birləşdirmək və müharibədən sonra regional birlik yaratmaqdır. Bununla belə, ABŞ-ın bütün regional müttəfiqlərinin bu planı dəstəkləyib-dəstəkləməyəcəyi hələ məlum deyil.

www.24news.ge

Tramp administrasiyası İranla müharibədən sonrakı Yaxın Şərq strategiyası hazırlayır

Digər xəbərlər