Tbilisidə “Birinci Türkoloji Qurultay – 100 il: Tarixdən gələcəyə” adlı tədbir keçirilib (VİDEO)

Tbilisidə 1926-cı ildə Bakıda keçirilmiş Birinci Türkoloji Qurultayın 100 illiyinə həsr olunmuş "Birinci Türkoloji Qurultay 100 il: Tarixdən gələcəyə" adlı tədbir keçirilib. 24News.ge xəbər verir ki, tədbir Azərbaycanda fəaliyyət göstərən Nəriman Nərimanovun Xatirə Muzeyinin təşəbbüsü və "Maarif" təşkilatının təşkilatçılığı ilə Mirzə Fətəli Axundov adına Azərbaycan Mədəniyyət Muzeyində təşkil olunub. Tədbirdə Bakıdan dəvət olunmuş alim və tədqiqatçılar, həmçinin Gürcüstanda fəaliyyət göstərən ziyalılar iştirak ediblər. “Maarif” təşkilatının rəhbəri, iqtisadiyyat üzrə fəlsəfə doktoru Aygül İsayeva çıxışında Birinci Türkoloji Qurultayın 100 illiyinin Tbilisidə qeyd olunmasının xüsusi əhəmiyyət daşıdığını bildirib. O, Gürcüstanın da 1926-cı ildə keçirilmiş qurultayda 6 nəfərlik nümayəndə heyəti ilə təmsil olunduğunu xatırladaraq, türkoloji irsin Gürcüstanda yaşayan azərbaycanlılar üçün də mühüm əhəmiyyət daşıdığını vurğulayıb. Tədbirdə Türkiyənin Gürcüstandakı səfirliyinin təhsil müşaviri Yüksəl Kara çıxış edib. O, çıxışında Birinci Türkoloji Qurultayın Türk dünyasının elmi və mədəni həyatındakı əhəmiyyətindən danışıb. Daha sonra çıxış edən digər natiqlər 1926-cı ildə Bakıda keçirilmiş Birinci Türkoloji Qurultayın türk xalqlarının elm, dil və mədəniyyət tarixindəki rolu, qurultayda müzakirə olunan dil, ədəbiyyat, tarix, etnoqrafiya, mədəniyyət və əlifba məsələləri, eləcə də onun türkoloji elmin inkişafına təsiri barədə danışıblar. Çıxışlarda Birinci Türkoloji Qurultayın türk xalqlarının ortaq elmi və mədəni irsində mühüm yer tutduğu, onun 100 illiyinin Tbilisidə qeyd edilməsinin isə Azərbaycan və Gürcüstan arasında elmi-mədəni əlaqələrin inkişafı baxımından əhəmiyyət daşıdığı vurğulanıb.

www.24news.ge

Tbilisidə “Birinci Türkoloji Qurultay – 100 il: Tarixdən gələcəyə” adlı tədbir keçirilib (VİDEO)

Digər xəbərlər