Mağazalardan oğurluq edən 6 yeniyetmə saxlanılıb (VİDEO)

Daxili İşlər Nazirliyinin Tbilisi Polis Departamentinin Yetkinlik Yaşına Çatmayanlarla İş üzrə Baş İdarəsi əməkdaşları müxtəlif vaxtlarda törədilmiş qrup halında soyğunçuluq, oğurluq və dələduzluq faktları üzrə 6 azyaşlı və ya yetkinlik yaşına çatmayan şəxsi saxlayıblar. 24News.ge xəbər verir ki, bu barədə məlumatı Daxili İşlər Nazirliyi yayıb. Nazirliyin açıqlamasına görə, saxlanılanlardan dördü əvvəllər məhkum olunub və hazırda şərti cəza altında olublar. İstintaq materiallarına əsasən, yeniyetmələr əvvəlcədən razılaşaraq qrup şəklində Tbilisidə fəaliyyət göstərən aptek və ərzaq mağazaları şəbəkələrindən müxtəlif dəyərdə məhsullar oğurlayıb, daha sonra hadisə yerindən qaçıblar. Araşdırma zamanı həmçinin müəyyən edilib ki, təqsirləndirilən şəxslərdən biri bir vətəndaşa məxsus mobil telefonu dələduzluq yolu ilə ələ keçirib. Daxili İşlər Nazirliyinin məlumatına görə, yeniyetmələrin qanunsuz əməlləri nəticəsində müxtəlif ticarət obyektlərinə ümumilikdə 30 min lariyə yaxın maddi ziyan dəyib. İstintaq çərçivəsində hüquq-mühafizə orqanları tərəfindən onlarla ticarət obyektinin müşahidə kameralarının görüntüləri götürülüb. Həmin görüntülərin saxlanılan şəxslərin cinayət əməllərini təsdiqlədiyi bildirilir. Faktla bağlı araşdırma Cinayət Məcəlləsinin soyğunçuluq, oğurluq və dələduzluğa dair 178-ci, 177-ci və 180-ci maddələri üzrə aparılır. Bu maddələr təqsirli bilinən şəxslər üçün 8 ilədək azadlıqdan məhrumetmə cəzası nəzərdə tutur.

www.24news.ge

Mağazalardan oğurluq edən 6 yeniyetmə saxlanılıb (VİDEO)

Digər xəbərlər