Zelenski Putinə görüş və danışıqlar müddətində atəşkəs təklif edib, Putin isə cavabında...

Ukrayna Prezidenti Volodimir Zelenski rusiyalı həmkarı Vladimir Putinə görüş və danışıqlar müddətində atəşkəs təklifi ilə açıq məktub yazıb. 24News.ge Ukrayna mediasına istinadən xəbər verir ki, məktubun tam mətni Prezidentin saytında dərc olunub. Zelenski bildirib ki, Ukrayna "hamının hamıya" formulu ilə əsir mübadiləsinə, mülki şəxslərin və uşaqların qaytarılmasına, eləcə də ABŞ və Avropanın təhlükəsizlik qarantları qismində mümkün iştirakı ilə birbaşa ikitərəfli formata hazırdır. O, görüşün neytral ərazidə keçirilməsini təklif edib və bildirib ki, cəbhə xətti diplomatiyanın başlayacağı xətt olmalıdır: "Biz öz insanlarımızı itiririk və hər bir itkimiz bizim üçün ağırdır... Siz artıq müntəzəm olaraq, bir neçə aydan bir regionlarımızın, ilk növbədə də Donetsk vilayətinin ələ keçirilməsi üçün son müddətləri təxirə salırsınız. Onu bu il də ələ keçirə bilməyəcəksiniz. Lakin biz Ukraynada daimi müharibə istəmirik. Biz yaxşı bilirik ki, müharibəsiz daha yaxşıdır. Biz buna nail olmaq istəyirik. Mən əminəm ki, rusiyalıların əksəriyyəti buna müsbət cavab verməyə hazırdır və siz bunu bilirsiniz. Müharibə və sülh məsələlərinin həlli üçün ənənəvi olaraq liderləri qəbul edən ölkələr var. İsveçrə, Türkiyə, Ərəb ölkələri - bir çoxları bu görüşə ev sahibliyi edə bilər və etmək istəyir. Məhz liderlər əsas məsələləri həll edirlər - bu, həmişə belə olub və olacaq. Mən görüşün dəqiq tarixini müəyyən etməyi təklif edirəm. Eşitmişik ki, Alyaskada sizə Ukrayna və Avropaya aid olan bəzi məsələlərin həllini söz veriblər. Amma siz görürsünüz ki, Ukrayna və Avropa məsələləri Ankoricdə həll olunmur. Lakin biz hesab edirik ki, ABŞ prosesdə iştirak etməlidir və bu, regionumuzdakı yeni təhlükəsizlik arxitekturasının konfiqurasiyasını müəyyən edə biləcək bir amildir", - deyə məktubda qeyd olunub. Rusiya Prezidenti Vladimir Putin Ukrayna Prezidenti Volodimir Zelenski tərəfindən ünvanlanan açıq məktuba münasibət bildirib və sənədin “kobudluq elementləri” daşıdığını deyib. Putin bu barədə Sankt-Peterburq Beynəlxalq İqtisadi Forumu çərçivəsində çıxışı zamanı danışıb. “Haqqında danışdığınız məktub həqiqətən də kobudluq elementləri ehtiva edir. Bu nə deməkdir? Bu, şəxsi görüş və danışıqlar üçün şərait yaratmaq cəhdidir, yoxsa belə görüşlərin keçirilməsini faktiki olaraq mümkünsüz edən mühit formalaşdırmaq istəyidir? Məncə, ikinci variantdır”, – deyə Putin bildirib. Rusiya liderinin sözlərinə görə, münaqişə ilə bağlı əsas məsələlər yalnız Rusiya və Ukrayna arasında həll edilməlidir. O qeyd edib ki, digər tərəflər, o cümlədən ABŞ, yalnız proses üçün şərait yarada və mümkün razılaşmaların təminatçısı rolunda çıxış edə bilərlər: “Təbii ki, əsas məsələləri yalnız Rusiya və Ukrayna öz aralarında həll etməlidirlər. ABŞ-dakı və digər regionlardakı tərəfdaşlarımız isə yalnız şərait yarada və təminatçı funksiyasını yerinə yetirə bilərlər. Biz bu mövqedən çıxış edirik”, – deyə Putin vurğulayıb. O, həmçinin hazırkı mərhələdə Zelenski ilə şəxsi görüş keçirməyin məqsədəuyğun olmadığını bildirib: “Hazırda belə bir görüşdə məna görmürük. Ukrayna tərəfinin məqsədi bizim hücumlarımızı dayandırmaqdır, bizim isə əldə edilməli olan konkret razılaşmalara ehtiyacımız var”, – deyə Rusiya Prezidenti əlavə edib.

www.24news.ge

Zelenski Putinə görüş və danışıqlar müddətində atəşkəs təklif edib, Putin isə cavabında...

Digər xəbərlər