აზერბაიჯანმა რუსეთს ნოტა გაუგზავნა

2026 წლის 6 თებერვალს, რუსეთის ფედერაციის საგანგებო და სრულუფლებიანი ელჩი აზერბაიჯანის რესპუბლიკაში, მიხაილ ევდოკიმოვი, საგარეო საქმეთა სამინისტროში დაიბარეს. 24News.ge იუწყება, რომ ამის შესახებ ინფორმაცია საგარეო საქმეთა სამინისტრომ გაავრცელა. განცხადებაში აღნიშნულია, რომ რუსეთის ელჩთან შეხვედრის დროს, 5 თებერვალს, რუსეთის ფედერაციის სახელმწიფო დუმის დსთ-ის, ევრაზიული ინტეგრაციის საკითხებისა და თანამემამულეებთან ურთიერთობების კომიტეტის თავმჯდომარის პირველი მოადგილის, მმართველი პარტია „ერთიანი რუსეთის“ წევრის კონსტანტინ ზატულინის განცხადებასთან დაკავშირებით, რომელიც აზერბაიჯანში სომხეთის რესპუბლიკის მოქალაქეების გასამართლებას ეხებოდა, მკაცრი პროტესტი გამოითქვა და რუსეთის მხარეს შესაბამისი ნოტა გადაეცა. აღნიშნულია, რომ კ. ზატულინის მიერ ხანგრძლივი პერიოდის განმავლობაში აზერბაიჯანის რესპუბლიკის სუვერენიტეტისა და ტერიტორიული მთლიანობის წინააღმდეგ გაკეთებული განცხადებები, სეპარატიზმისადმი ღია მხარდაჭერის გამოხატვა, ასევე მცდელობა დაამახინჯოს სასამართლო გადაწყვეტილებები იმ სომხეთის რესპუბლიკის მოქალაქეებთან დაკავშირებით, რომლებიც სომხეთის მიერ აზერბაიჯანის რესპუბლიკის წინააღმდეგ განხორციელებული სამხედრო აგრესიის შედეგად მშვიდობისა და კაცობრიობის წინააღმდეგ ჩადენილ დანაშაულებში, ასევე სამხედრო დანაშაულებში დამნაშავედ იქნენ ცნობილი და მსჯავრდებულნი არიან, და მის მიერ გამოყენებული მიუღებელი გამონათქვამები მკაცრად იქნა დაგმობილი. შეხვედრაზე რუსეთის მხარეს მოუწოდეს, მიიღოს შესაბამისი ზომები ზატულინის მსგავს პირებთან მიმართებით, რომლებიც რეგიონში მშვიდობასა და სტაბილურობას, ასევე აზერბაიჯანსა და რუსეთს შორის ურთიერთობებს ზიანს აყენებენ და დესტრუქციულ საქმიანობას ეწევიან.

www.24news.ge

აზერბაიჯანმა რუსეთს ნოტა გაუგზავნა

სხვა სიახლეები