ოპოზიციური პარტიების აკრძალვასთან დაკავშირებული სასამართლო პროცესი გაგრძელდება

საქართველოს საკონსტიტუციო სასამართლოში ხელისუფლების გუნდის მიერ შეტანილი სარჩელის განხილვა, რომელიც ხუთი ოპოზიციური პარტიის აკრძალვას ეხება, 22 ოქტომბერს, 12:00 საათზე გაგრძელდება. 24News.ge-ის ინფორმაციით, საკონსტიტუციო სასამართლომ ოპოზიციური პარტიების წარმომადგენლების მიერ დაყენებული არცერთი შუამდგომლობა არ დააკმაყოფილა. სასამართლოს თავმჯდომარის, რევაზ ნადარაიას განცხადებით, პროცესი კვლავ შუამდგომლობების განხილვის ეტაპზეა. საქმეს საკონსტიტუციო სასამართლოს შვიდი მოსამართლისგან შემდგარი პლენუმი განიხილავს. არსებული ინფორმაციით, სარჩელს ხელი საქართველოს პარლამენტის 88-მა დეპუტატმა მოაწერა. სარჩელის საფუძველზე განიხილება შემდეგი ხუთი პოლიტიკური გაერთიანების არაკონსტიტუციურად ცნობისა და მათი პოლიტიკური საქმიანობის აკრძალვის საკითხი: „ერთიანობა – ნაციონალური მოძრაობა“; „კოალიცია ცვლილებებისთვის“; „ძლიერი საქართველო – ლელო“; „ფედერალისტების პარტია“; პარტია „გახარია საქართველოსთვის“. სარჩელის ავტორების განცხადებით, აღნიშნული პოლიტიკური გაერთიანებები 2016 წლიდან მოყოლებული მუდმივად აყენებენ ეჭვქვეშ საქართველოს ამჟამინდელი ხელისუფლებისა და მმართველი პარტიის ლეგიტიმურობას როგორც საშინაო, ისე საგარეო პოლიტიკის სფეროში. სარჩელში აღნიშნულია, რომ ამ პარტიების საქმიანობა მიმართულია საქართველოს კონსტიტუციური წყობილების დამხობისა და ძალადობრივი გზით შეცვლისკენ, ქვეყნის დამოუკიდებლობის ხელყოფისა და ტერიტორიული მთლიანობის დარღვევისკენ. ამ მიზეზით, სარჩელის ავტორები მოითხოვენ აღნიშნული პარტიების არაკონსტიტუციურად ცნობასა და მათი პოლიტიკური საქმიანობის აკრძალვას. პარტიების აკრძალვის ერთ-ერთი არგუმენტი ასევე უკავშირდება იმას, რომ ისინი წლების განმავლობაში მსგავს პოზიციას ავლენდნენ არჩევნების გზით ჩამოყალიბებულ სახელმწიფო ორგანოებში, ქვეყანაში მიმდინარე პოლიტიკურ პროცესებსა და სარჩელში მითითებულ ქმედებებთან დაკავშირებით, მათ შორის, საქართველოს სახელმწიფოს წინააღმდეგ მიმართულ დივერსიულ საქმიანობაში. სარჩელის ავტორები მიიჩნევენ, რომ ეს ხუთი პარტია საერთო მიზნების გარშემო გაერთიანებული კოალიციის სახით მოქმედებდა და ამჟამადაც იმავე მიმართულებით მოქმედებს. საკონსტიტუციო სარჩელს ასევე ერთვის საქართველოს პარლამენტის XI მოწვევის ფარგლებში შექმნილი დროებითი საგამოძიებო კომისიის დასკვნა. აღსანიშნავია, რომ საქმეზე არსებითი განხილვის სასამართლო სხდომები 21, 22 და 23 ოქტომბერს არის დაგეგმილი.

www.24news.ge

ოპოზიციური პარტიების აკრძალვასთან დაკავშირებული სასამართლო პროცესი გაგრძელდება

სხვა სიახლეები