კობახიძე ღარიბაშვილის განცხადებას დავით გარეჯთან დაკავშირებით გამოეხმაურა

პრემიერ-მინისტრი ირაკლი კობახიძე გამოეხმაურა ყოფილი პრემიერ-მინისტრის, ირაკლი ღარიბაშვილის მიერ დავით გარეჯის საკითხთან დაკავშირებით ახალ წერილში გამოთქმულ მოსაზრებებს. 24News.ge-ის ინფორმაციით, კობახიძემ აღნიშნა, რომ ღარიბაშვილის განცხადებები უკვე აღარავის ინტერესს აღარ წარმოადგენს. კობახიძე ღარიბაშვილის მიერ საკითხთან დაკავშირებით გადადგმული ნაბიჯების ჩამოთვლას ასე გამოეხმაურა: „როგორც ჩანს, საკითხი მოუგვარებია და მე ამის შესახებ არაფერი ვიცოდი“. პრემიერ-მინისტრმა აღნიშნა, რომ მნიშვნელოვანი საკითხების მოსაგვარებლად ყველა მაქსიმუმს აკეთებს. მისი თქმით, საქართველო აზერბაიჯანთან და სომხეთთან საზღვრების დელიმიტაციისა და დემარკაციის საკითხებს რეგულარულად განიხილავს. „ჩვენ მუდმივად ვსაუბრობთ ჩვენს აზერბაიჯანელ და სომეხ მეგობრებთან საზღვრების დემარკაციისა და დელიმიტაციის საკითხებზე. ეს ერთ-ერთი მნიშვნელოვანი საკითხია. როგორც აზერბაიჯან-საქართველოს, ისე სომხეთ-საქართველოს მიმართულებით მხარეები თანხმდებიან, რომ აუცილებელია ამ პროცესის აქტიურად გაგრძელება. იმედი გვაქვს, რომ ამ მიმართულებით მნიშვნელოვან პროგრესს მივაღწევთ. მუშაობა აქტიურად მიმდინარეობს. ვიმედოვნებთ, რომ იმას, რისი მოგვარებაც მან ვერ შეძლო, ჩვენ შევძლებთ“, – განაცხადა კობახიძემ. აღსანიშნავია, რომ საქართველოს ყოფილმა პრემიერ-მინისტრმა ირაკლი ღარიბაშვილმა ახალ წერილში დავით გარეჯის საკითხსაც შეეხო და ისაუბრა იმ სამუშაოებზე, რომლებიც ამ მიმართულებით პრემიერ-მინისტრობისა და თავდაცვის მინისტრობის პერიოდში განხორციელდა.

www.24news.ge

კობახიძე ღარიბაშვილის განცხადებას დავით გარეჯთან დაკავშირებით გამოეხმაურა

სხვა სიახლეები