7 müxalif partiya İvanişvili hakimiyyətinə qarşı birləşmək qərarına gəldiklərini açıqlayıblar

Ölkənin müxalif partiyaları İvanişvili hakimiyyətinin siyasi təqib və repressiyalarını sərt tənqid edərək, birgə çalışacaqlarını elan ediblər. 24News.ge xəbər verir ki, bununla bağlı “Axali”, “Girçi – Daha çox azadlıq”, “Droa”, Milli Demokrat Partiyası, Avropalı Gürcüstan, “Azadlıq meydanı” və Federalistlər partiyası bəyanat yayıb. Partiyaların bildirdiyinə görə, “Gürcü Arzusu” hakimiyyəti qorumaq məqsədilə ölkənin təhsil, səhiyyə və sosial yardım sistemindən sui-istifadə edir, inzibati nəzarəti və repressiyaları gücləndirir. Onlar vurğulayıblar ki, rejim saxta işlər və təzyiqlər vasitəsilə ailələri illərlə ayırıb və ölkədə mövcud problemləri daha da dərinləşdirib. Bəyanatda qeyd olunur ki, korrupsiya və vəzifədən şəxsi mənfəət üçün istifadə rejim nümayəndələrinin həyat tərzinə çevrilib və Gürcüstan azad dünyadan uzaqlaşaraq Rusiya qarşısında tənha qalıb. Müxalif partiyalar həmçinin bildiriblər ki, bütün bu cəhdlərə baxmayaraq, cəmiyyətin ədalətli etirazı davam edir və rejimin xalq, beynəlxalq və mənəvi legitimliyi yoxdur. Bəyanatda tərəflər vurğulayıblar ki, ortaq məqsəd xalqı talayan, korrupsiyalı rejimi dəyişmək, həbsdə olan yazıçılar, həkimlər, tələbələr, aktyorlar və siyasətçiləri azad etmək, Gürcüstanın müstəqilliyini və dövlətçiliyini qorumaqdır. Müxalif partiyaların sözlərinə görə, gürcü xalqı ədalətli, təhlükəsiz və azad bir ölkədə yaşamağa layiqdir və repressiyalar qarşısında dayanacaq. Partiyalar mübarizənin sona qədər davam edəcəyini və hakimiyyətin xalqın əlində olmasını təmin edəcəklərini bəyan ediblər. Xatırladaq ki, ötən gün Baş Prokurorluq eks prezident Mixeil Saakaşvili, müxalifət liderləri - Giorgi Vaşadze, Nika Qvramiya, Nika Meliya, Zurab Caparidze, Elene Xoştariya, Mamuka Xazaradze və Badri Caparidzeyə qarşı cinayət işi açıldığını bildirib. Qeyd olunub ki, sözügedən şəxslər dövlət əleyhinə bir sıra ağır cinayətlərdə ittiham olunurlar.

www.24news.ge

7 müxalif partiya İvanişvili hakimiyyətinə qarşı birləşmək qərarına gəldiklərini açıqlayıblar

Digər xəbərlər