Marneulidə "Tasua" yürüşünə qatılan insanların təxmini sayı məlum olub (VİDEO)

Məhərrəm ayının 9-cu günü Marneulidə yerli əhali, ətraf kəndlər və digər şəhərlərdən gələn inanclı insanların iştirakı ilə "Tasua" mərasimi keçirilib. 24News.ge xəbər portalı beynəlxalq media qurumlarının aksiyalar və yürüşlərdə iştirakçı sayını müəyyənləşdirmək üçün istifadə etdiyi metodlardan yararlanaraq bu gün baş tutan "Tasua" mərasiminə qatılanların təxmini sayını hesablayıb. Hesablamalara əsasən, bu il Marneulidə keçirilən "Tasua" yürüşündə minimum 3 min 600, maksimum isə 4 min 800 nəfər iştirak edib. Belə ki, istifadə olunan metod iştirakçıların toplaşdığı və ya hərəkət etdiyi ərazinin ölçüsünün hesablanmasına əsaslanır. Əldə edilən sahə üçə, sıxlıq olduqda isə dördə vurulur. 5 iyul tarixində Marneulidə keçirilən yürüş zamanı karvanın əvvəli ilə sonu arasındakı məsafə təxmini olaraq 1200 metr təşkil edib. Bu rəqəm 3-ə vurulduqda 3 min 600, 4-ə vurulduqda isə 4 min 800 nəfər təşkil edir. Bu ilki mərasimdə əvvəlki illərlə müqayisədə kişi iştirakçılar daha az müşahidə olunub, qadınların sayı isə kişilərdən iki-üç dəfə çox olub. Qeyd edək ki, bu kimi yürüş və digər aksiyaların iştirakçı sayını dəqiq hesablamaq çətindir.

www.24news.ge

Marneulidə "Tasua" yürüşünə qatılan insanların təxmini sayı məlum olub (VİDEO)

Digər xəbərlər