İrakli Qaribaşvilinin vəkili iddialı açıqlamalar yayıb

Gürcüstanın keçmiş baş naziri İrakli Qaribaşvilinin vəkili Lili Gelaşvili bəyanat yayıb. O, oktyabrın 19-da Qaribaşvili barəsində açılmış yeni rüşvət işi üzrə məhkəmənin hazırlıq iclasının keçiriləcəyini bildirib və işin siyasi təzyiqdən azad, qərəzsiz məhkəmə şəraitində bəraət hökmü ilə başa çatmalı olduğunu vurğulayıb. 24News.ge xəbər verir ki, vəkil bununla bağlı sosial şəbəkədə geniş açıqlama yayıb. Lili Gelaşvilinin sözlərinə görə, ictimaiyyət indiyədək əsasən ittiham tərəfinin mövqeyini dinləyib. O, işin 48 cildlik materialları ilə tanış olduqdan sonra Qaribaşvilinin təqsirini təsdiqləyən sübutların yetərli olmadığını iddia edib. Vəkil bildirib ki, onun fikrincə, işdə Qaribaşvilinin ittihamını təsdiqləmək üçün yalnız Mxeidzenin dolayı ifadəsi və Burçuladzenin verdiyi ifadə mövcuddur və bu ifadələr də tam deyil. Gelaşvili qeyd edib ki, məhkəmə araşdırması zamanı ifadələrin nəyi təsdiqlədiyi, onları dəstəkləyən müstəqil sübutların olub-olmadığı, ifadələrin nə dərəcədə ardıcıl olduğu və şahidlərin hansı maraqlara malik ola biləcəyi aydınlaşdırılmalıdır. Vəkil həmçinin iddia edib ki, adıçəkilən məhkumlar İrakli Qaribaşvilinin əleyhinə ifadə verməklə faktiki olaraq azadlıqlarını əldə ediblər. Onun sözlərinə görə, onların 10 illik həbs cəzaları üçdə bir azaldılıb, bəziləri isə həbsdən azad olunub. Gelaşvili bunu “razılaşdırılmış ədalət mühakiməsi” adlandıraraq, işin hüquqi araşdırmadan daha çox siyasi sifarişlə bağlı ola biləcəyini irəli sürüb. Vəkil açıqlamasında İrakli Qaribaşvilinin həbsindən əvvəl keçirilən axtarışlarla bağlı məlumatlara da toxunub. Onun sözlərinə görə, Baş Prokurorluq müxtəlif şəxslərin evlərində axtarışların aparıldığını açıqlayarkən Qaribaşvilinin də adını çəkib. Daha sonra istintaq orqanı axtarışlar zamanı götürülən əşyaların, o cümlədən qızıl külçələrin və müxtəlif qiymətli əşyaların görüntülərini yayıb, lakin onların konkret olaraq kimlərin evindən götürüldüyünü açıqlamayıb. Gelaşvili hesab edir ki, bu görüntülər cəmiyyətdə qızıl külçələrin Qaribaşvilinin evindən götürüldüyü barədə təəssürat yaratmaq məqsədilə yayımlanıb. Vəkil iddia edib ki, iş materialları Qaribaşvilinin yaşadığı evdən qızıl külçələrin götürülmədiyini göstərir. O, bu halda həmin görüntülərin hansı məqsədlə və kimin göstərişi ilə yayımlandığına dair sualların yarandığını bildirib. Lili Gelaşvili açıqlamasında İrakli Qaribaşvilinin həbsdə olduğu müddətdə ona göndərildiyi bildirilən məktub barədə də danışıb. Vəkilin sözlərinə görə, Qaribaşvili həmin məktubu özü ictimailəşdirib və onun müəllifi kimi Mamuka Mindağnadzeni göstərib. Gelaşvili iddia edib ki, məktubda Qaribaşvilidən hələ mövcud olmayan yeni ittihamı etiraf etməsi istənilib. Onun fikrincə, məqsəd Qaribaşvilinin gələcəkdə siyasətə qayıtması ehtimalını aradan qaldırmaq olub. Vəkil bildirib ki, məktubun bu ilin iyulunda göndərildiyi iddia olunur. Onun sözlərinə görə, Mxeidze, Tukvadze və Burçuladze həmin vaxt artıq dindirilib və onlar Qaribaşvilinin rüşvət verməsi barədə ifadə verməyiblər. Gelaşvilinin açıqlamasına əsasən, həmin şəxslər avqustun 18–21-də dindirilib. O, Mindağnadzenin iyul ayında Burçuladzenin avqustda Qaribaşvilinin əleyhinə ifadə verəcəyini necə bilə biləcəyi ilə bağlı sual qaldırıb. Vəkil həmçinin Qaribaşvilinin məktubu ictimailəşdirərək konkret şəxsin adını çəkməsinə baxmayaraq, Baş Prokurorluğun məsələ ilə bağlı araşdırmaya başlamamasını sual altına alıb. Gelaşvili məktubda korrupsiya hallarının üzə çıxarılmasından daha çox Qaribaşvilinin siyasi baxımdan zərərsizləşdirilməsi niyyətinin əks olunduğunu iddia edib. Vəkil Qaribaşvilinin ailə üzvlərinin işdən çıxarılması və onun azyaşlı övladları ilə görüşlərinin ləğv edilməsi məsələlərini də gündəmə gətirib. O, bu halların siyasi təzyiqin tərkib hissəsi olub-olmadığını sorğulayıb. Gelaşvili hazırda hakim komandada baş verən kadr və siyasi dəyişikliklər fonunda Qaribaşvilinin siyasi baxımdan zərərsizləşdirilməsinin kimlərin maraqlarına xidmət etdiyini araşdırmağın vacib olduğunu bildirib. O, keçmiş baş nazirin reputasiyasının məhv edilməsində kimin maraqlı ola biləcəyi və hüquqi işin siyasi mübarizə vasitəsinə çevrilib-çevrilmədiyi barədə suallar səsləndirib. Vəkil hakimiyyət nümayəndələrini də tənqid edərək bildirib ki, Qaribaşvilini və Gürcüstanın sabiq prezidenti Mixeil Saakaşvilini müqayisə edən şəxslər özləri də oxşar şəraitdə həbsdə qalmağın və siyasi təzyiqlə üzləşməyin nə demək olduğunu anlamalıdırlar. O, həmçinin Qaribaşvilinin ailə üzvlərinin əvvəlki hakimiyyət dövründə həbsdə saxlanıldığını və ondan Bidzina İvanişvili ilə əlaqələrini kəsməsinin tələb edildiyini iddia edib. Bəyanatının sonunda Lili Gelaşvili oktyabrın 19-da keçiriləcək hazırlıq iclasının əhəmiyyətini vurğulayıb. O, Gürcüstanda qərəzsiz və siyasi təzyiqdən azad məhkəmənin fəaliyyət göstərməsini istədiyini bildirib: “Mən artıq 1937-ci ilin acı günlərinin, eləcə də ədalətin olmadığı doqquzillik rejimin təkrarlanmasını istəmirəm. Müstəqil məhkəmə uğrunda boş yerə mübarizə aparmadığımıza inanmaq istəyirəm. Mən azadlığa dəyişdirilmiş bir ifadə əsasında təqsirləndirilən şəxs barəsində ittiham hökmü çıxarmayan, qərəzsiz və siyasi təzyiqdən azad hakim istəyirəm. Mən İrakli Qaribaşviliyə deyil, özünə və öz institutuna hökm çıxarmayan məhkəmə istəyirəm. Mən hüquqi dövlət istəyirəm. Məgər bu, çox şeydir?”, – deyə vəkil yazıb.

www.24news.ge

İrakli Qaribaşvilinin vəkili iddialı açıqlamalar yayıb

Digər xəbərlər