Papuaşvili AŞPA prezidenti ilə görüşdə AŞPA-nı Gürcüstanın suverenliyini pozmaqda ittiham etdi

Gürcüstan parlamentinin sədri Şalva Papuaşvili Avropa Şurası Parlament Assambleyasının (AŞPA) prezidenti Petra Bayr ilə görüşüb. 24News.ge xəbər verir ki, görüş zamanı Şalva Papuaşvili son illərdə beynəlxalq təşkilatların siyasi məqsədlərə nail olmaq üçün tez-tez alətə çevrildiyini bildirib. O, AŞPA-nın Gürcüstan parlamentinin nümayəndə heyətinə münasibətini buna nümunə göstərib. Tərəflər Gürcüstan parlamenti ilə AŞPA arasındakı münasibətləri müzakirə ediblər. Hazırda Gürcüstan parlamentinin Assambleyada nümayəndə heyətinin olmadığı qeyd olunub. Şalva Papuaşvili AŞPA-nın 2025-ci ilin yanvarında qəbul etdiyi qətnaməyə diqqət çəkərək, sənədin Gürcüstanın suverenliyini kobud şəkildə pozduğunu bildirib. Onun sözlərinə görə, Gürcüstan nümayəndə heyətinin səlahiyyətlərinin uzadılması üçün yeni parlament seçkilərinin keçirilməsi şərtinin irəli sürülməsi Assambleyanın öz prinsiplərinə zidd olub. Papuaşvili əməkdaşlığın bərpası üçün Gürcüstan nümayəndə heyətinin səlahiyyətlərinin qeyd-şərtsiz tanınmasını vacib hesab etdiyini bildirib. O, həmçinin Gürcüstanın Avropa Şurasının əsas prinsiplərinə və dəyərlərinə sadiq qaldığını vurğulayıb. Görüş İtaliyanın paytaxtı Romada keçirilən Avropa Şurasına üzv ölkələrin parlament sədrlərinin konfransı çərçivəsində baş tutub. Gürcüstan parlament nümayəndə heyətinin tərkibində Xarici Əlaqələr Komitəsinin sədri Nikoloz Samxaradze, Avropaya İnteqrasiya Komitəsinin sədri Levan Maxaşvili və parlamentin “Xalqın Gücü” siyasi qrupunun sədr müavini Eka Sepaşvili də yer alıblar.

www.24news.ge

Papuaşvili AŞPA prezidenti ilə görüşdə AŞPA-nı Gürcüstanın suverenliyini pozmaqda ittiham etdi

Digər xəbərlər