Şeyxdən hicab və təhsil məsələsi ilə bağlı mesaj: “Təhsil və dini dəyərlər gənclərin gələcəyində mühüm yer tutur”

Bütün Gürcüstan Müsəlmanları İdarəsinin Şeyxi Hacı Faiq Nəbiyev Azərbaycanda hicab və təhsil məsələsi ətrafında aparılan müzakirələrlə bağlı fikirlərini bölüşüb. 24News.ge xəbər portalının suallarını cavablandıran şeyx, elmə yiyələnməyin və dini inanclara bağlılığın bir-birini tamamladığını vurğulayaraq, bu kimi həssas mövzuların xoş niyyət, təmkin və dialoq əsasında müzakirə edilməsinin əhəmiyyətini qeyd edib. Jurnalist: Hicab və təhsil məsələsi cəmiyyətdə niyə bu qədər diqqət çəkir? Hacı Faiq Nəbiyev: "Azərbaycan xalqının zəngin tarixi, mədəni irsi və dərin dini-mənəvi ənənələri var. Bu gün də cəmiyyətdə həm yüksək təhsil almağa çalışan, həm də öz dini inanclarını yaşadan gənc xanımlar mövcuddur. Onların bilik qazanmaq, peşə sahibi olmaq və eyni zamanda mənəvi dəyərlərinə sadiq qalmaq istəyi başadüşüləndir. İnsanın təhsil alması ilə öz inancına bağlı yaşaması arasında ziddiyyət görmürəm. Əksinə, elm və mənəviyyat insanın şəxsiyyət kimi formalaşmasında bir-birini tamamlayan iki mühüm istiqamətdir. Bu səbəbdən hicab və təhsil mövzusuna həssaslıqla yanaşmaq, məsələnin həm ictimai, həm də insani tərəflərini nəzərə almaq önəmlidir". Jurnalist: İslam dinində geyim və elmə yiyələnmək məsələləri necə qiymətləndirilir? Hacı Faiq Nəbiyev: "İslam təlimlərində elm öyrənmək, düşünmək, əxlaqi keyfiyyətləri qorumaq və mənəvi cəhətdən inkişaf etmək xüsusi yer tutur. Qurani-Kərimin “Nur” surəsinin 31-ci və “Əhzab” surəsinin 59-cu ayələrində iffət və örtünmə məsələlərinə toxunulur. Eyni zamanda, İslamın ümumi prinsipləri insanı bilik əldə etməyə, düşünməyə və faydalı işlərlə məşğul olmağa təşviq edir. Mənim qənaətimcə, insan həm savadlı, həm də mənəvi baxımdan zəngin ola bilər. Gənclərin müasir biliklərə yiyələnməsi, öz qabiliyyətlərini inkişaf etdirməsi və əxlaqi dəyərlərini yaşatması cəmiyyətin gələcəyi üçün də dəyərlidir". Jurnalist: Qızların təhsil müəssisələrində müəyyən çətinliklərlə üzləşməsi hansı nəticələrə səbəb ola bilər? Hacı Faiq Nəbiyev: "Təhsil gənclərin gələcəyini müəyyənləşdirən, dünyagörüşünü genişləndirən və cəmiyyətdə öz yerini tapmasına kömək edən əsas amillərdəndir. Gənc xanımların təhsil almaq, bilik və bacarıqlarını artırmaq arzusu onların gələcəyə inamla baxmasının mühüm şərtidir. Belə məsələlər ətrafında yaranan narahatlıqların həssaslıqla qarşılanması və səmimi ünsiyyət şəraitində müzakirə olunması yaxşı nəticələr verə bilər. İnsanların mənəvi dünyasının anlaşılması, onların cəmiyyətin ayrılmaz hissəsi olduqlarını hiss etməsi etimadın möhkəmlənməsinə kömək edir. Əsas odur ki, gənclərin elmə marağı və gələcək qurmaq istəyi daim qorunsun". Jurnalist: Bu məsələyə yanaşmada hansı mövqeni daha uyğun hesab edirsiniz? Hacı Faiq Nəbiyev: "Hər bir ölkənin öz qanunvericiliyi, ictimai xüsusiyyətləri və təhsil ənənələri var. Bu məsələləri qiymətləndirərkən həmin xüsusiyyətlərə hörmətlə yanaşmaqla yanaşı, insanların dini və mənəvi həssaslıqlarını da anlamağa çalışmaq vacibdir. Məncə, belə mövzuların dostyana münasibət və xoş niyyət çərçivəsində müzakirəsi daha uğurlu nəticələrə zəmin yaradır. Təhsil sisteminin tələbləri ilə dini inanclara ehtiram arasında anlaşmanın formalaşması həm insanlara, həm də cəmiyyətə müsbət təsir göstərə bilər. Məqsəd kiminsə mövqeyini qarşı tərəfə qəbul etdirmək deyil, bir-birini dinləmək, narahatlıqları anlamaq və ortaq məxrəcə gəlməkdir. Səmimi dialoq və təmkin bir çox məsələnin daha rahat şəkildə müzakirəsinə imkan verir". Jurnalist: Belə həssas məsələlərin müzakirəsində hansı prinsiplər əsas götürülməlidir? Hacı Faiq Nəbiyev: "İlk növbədə, xoş niyyət, ədalət, insan ləyaqətinə ehtiram və sağlam ünsiyyət ön planda olmalıdır. Cəmiyyətdə hər kəsin öz baxışları və düşüncələri ola bilər. Əsas məsələ bu mövqelərin bir-birinə qarşı qoyulmaması, insanların bir-birini dinləməyə və anlamağa çalışmasıdır. Dini icmaların, valideynlərin, təhsil sahəsinin nümayəndələrinin və ictimaiyyətin fikirlərinə diqqətlə yanaşılması ortaq anlayışın yaranmasına kömək edə bilər. İnanıram ki, səmimiyyət və xoşməramlı münasibət insanların bir-birinə yaxınlaşmasına, mövcud incikliklərin aradan qalxmasına və cəmiyyətdə həmrəyliyin güclənməsinə şərait yaradır". Jurnalist: Sonda bu məsələ ilə bağlı arzularınızı bölüşərdinizmi? Hacı Faiq Nəbiyev: "İnsanın təhsil alması, bilik qazanması və öz gələcəyini qurması ilə dini inanclarını yaşatması bir-birinə mane olmamalıdır. Elm insanın dünyagörüşünü genişləndirir, mənəvi dəyərlər isə onun həyatına istiqamət verir. Bu iki sahənin uzlaşması həm fərdin inkişafına, həm də ictimai birliyə töhfə verir. Azərbaycan xalqına, Dövlətinə, mədəniyyətinə və milli-mənəvi dəyərlərinə böyük hörmət bəsləyirəm. Azərbaycanla Gürcüstan xalqları və dövlətləri arasında mövcud olan dostluq və mehriban qonşuluq münasibətlərini də yüksək qiymətləndirirəm. Şəxsi təcrübəmə əsaslanaraq deyə bilərəm ki, insanların həssas yanaşdıqları məsələlərdə səmimiyyət və anlayış nümayiş etdirilməsi çox vaxt gözlənilən müsbət nəticələri verir. İnanıram ki, hicab və təhsil məsələsi də həssas və anlayışlı yanaşma ilə həllini taparsa, incikliklər aradan qalxar, qarşılıqlı etimad möhkəmlənər və heç kimin mənəvi dəyərləri ilə təhsil almaq hüququ arasında seçim etmək məcburiyyətində qalmadığı bir həll yolu tapılar. Multikulturalizm və tolerantlıq mühitində dini inanclara hörmət dövlətə bağlılığı möhkəmləndirir, bu da cəmiyyət üçün böyük dəyərdir. Belə bir nəticə inanclı təbəqə ilə dövlət arasında etimadın artmasına, birliyin güclənməsinə və insanların özlərini cəmiyyətin ayrılmaz hissəsi kimi daha yaxından hiss etməsinə kömək edər. Ən böyük arzum budur ki, bu kimi məsələlər dostluq, xoş niyyət və anlayış şəraitində öz müsbət həllini tapsın. Çünki cəmiyyətin gücü yalnız ortaq dəyərlərində deyil, bir-birini dinləmək, anlamaq və çətinlikləri birlikdə aşmaq bacarığındadır".

www.24news.ge

Şeyxdən hicab və təhsil məsələsi ilə bağlı mesaj: “Təhsil və dini dəyərlər gənclərin gələcəyində mühüm yer tutur”

Digər xəbərlər