DTX rəhbərinin keçmiş müavini 500 min lari məbləğində girovu əmlakı ilə təmin edəcək

Dövlət Təhlükəsizliyi Xidmətinin (DTX) rəisinin keçmiş müavini, korrupsiya cinayətində ittiham olunan Levan Axobadze barəsində müəyyən edilmiş 500 min lari məbləğində girovun onun əmlakı ilə təmin edilməsinə qərar verilib. 24News.ge xəbər verir ki, bu barədə bu gün keçirilən məhkəmə iclasında qərar qəbul olunub. Gözlənilmədən təyin edilən iclasda müdafiə tərəfi Axobadze barəsində müəyyən edilmiş girovun onun əmlakı hesabına təmin olunması barədə vəsatət qaldırıb. Məhkəmə vəsatəti təmin edib. Qeyd edək ki, Levan Axobadze barəsində əvvəlcə ən ağır qətimkan tədbiri olan həbs seçilmişdi. Lakin ötən məhkəmə iclasında həbs 500 min lari məbləğində girovla əvəz edilib və məbləğin ödənilməsi üçün 30 gün vaxt verilib. Vəkillər həmin girovun əmlakla təmin olunmasını istəyiblər. Məlumat üçün bildirək ki, DTX rəisinin keçmiş müavini Levan Axobadze Dövlət Təhlükəsizliyi Xidmətinin Antikorrupsiya Agentliyi tərəfindən saxlanılıb. O, xüsusilə külli miqdarda rüşvət almaqda ittiham olunur. İstintaqın məlumatına görə, DTX rəisinin keçmiş müavini sahibkara vasitəçilər üzərindən pulunun geri qaytarılmasına kömək edəcəyini vəd edib və bunun müqabilində 500 min lari rüşvət tələb edib. Lakin sonradan tərəflər 250 min lari məbləğində razılığa gəliblər. Axobadzeyə qarşı Cinayət Məcəlləsinin 338-ci maddəsinin 3-cü hissəsinin “e” bəndi ilə ittiham irəli sürülüb. Həmin maddə vəzifəli şəxsin rüşvət verənin xeyrinə müəyyən hərəkətləri həyata keçirmək və ya bu məqsədlə xidməti nüfuzundan istifadə etmək üçün xüsusilə külli miqdarda pul tələb etməsini və almasını nəzərdə tutur. Bu cinayətə görə 11 ildən 15 ilədək azadlıqdan məhrumetmə cəzası nəzərdə tutulur.

www.24news.ge

DTX rəhbərinin keçmiş müavini 500 min lari məbləğində girovu əmlakı ilə təmin edəcək

Digər xəbərlər