Saakaşvili Gürcüstan azərbaycanlılarını sevdiyini bildirib, hicabla bağlı yenidən sərt mövqe sərgiləyib

Hazırda həbsdə olan eks prezident Mixeil Saakaşvili Gürcüstanda yaşayan azərbaycanlıların hüquqları, dini azadlıqlar və hicab məsələsi ilə bağlı açıqlama yayıb. 24News.ge xəbər verir ki, Saakaşvili bu barədə sosial şəbəkə hesabında yazıb və prezidentliyi dövründə Gürcüstan azərbaycanlıların hüquqi vəziyyətinin yaxşılaşdırılmasını əsas nailiyyətlərindən biri hesab etdiyini bildirib. Dini məsələlərə toxunan sabiq prezident İslamla radikal islamizmin fərqləndirilməli olduğunu vurğulayıb. O, Gürcüstanın dünyəvi dövlət olduğunu və ölkədə dini mənsubiyyətə görə ayrı-seçkiliyin yolverilməzliyini bildirib: "Mən prezidentliyimin əsas nailiyyətlərindən biri kimi gürcü azərbaycanlıların hüquqi vəziyyətinin əhəmiyyətli dərəcədə yaxşılaşdırılmasını hesab edirəm. Mən onlara qarşı həyata keçirilən reketə son qoydum. Onların həm Gürcüstanda, həm də xaricdə ali təhsil müəssisələrinə yolunu açdım, onların iqtisadi və hüquqi ayrı-seçkiliyinə son qoydum. Mən onlara (azərbaycanlılara) gürcü dilini dövlət dili kimi və amerikalı müəllimlərin proqramı çərçivəsində ingilis dilini öyrənmək imkanı yaratdım. Tarixdə ilk dəfə onların 'tatar' adlandırılmasına son qoydum və bu termin bu gün yalnız çox marginal çevrələr tərəfindən istifadə olunur. Mən bizim azərbaycanlıları xüsusilə çox sevirəm və 'mən' sözünü çox işlətməyimə görə məni qınamayın. Çünki bu, məhz mənim şəxsi mövzum, böyük səylərim idi və onlar da hər zaman mənə yalnız minnətdarlıq və sevgi ilə cavab veriblər. İndi bir vaxtlar aktivist olmuş Samira Bayramovaya demək istəyirəm ki, biz bütün dinlərin qorunduğu dünyəvi ölkəyik və bu ənənə hələ Qurucu Davidin dövründən gəlir. O, kilsələrlə yanaşı məscidlərdə də ibadət edir və hər kəsi bərabər şəkildə qoruyurdu. Gürcüstanda dini mənsubiyyətə görə ayrı-seçkilik qadağandır. Mən heç vaxt radikal islamizmi İslamla eyniləşdirməmişəm. İslamizm dünya üçün, o cümlədən bizim üçün çox təhlükəlidir, çünki həqiqətən də terror, zorakılıq və müharibələrlə əlaqəlidir. İslamı isə biz alqışlayırıq və prezidentliyim dövründə də radikal islamçılara qarşı çıxmışam. Məhz mən prezidentliyimin ilk illərində Gürcüstanda yayılmış vəhhabiliklə mübarizə apararaq onun kökünü kəsdim və gələcəkdə də həmişə buna qarşı çıxacağam, sonadək kökünü kəsəcəyəm. Bu, bütün gürcülərin, o cümlədən gürcü azərbaycanlıların müdafiəsi üçün vacibdir. Hicab isə, elə İranda olduğu kimi, zülm alətinə çevrilib. ('İslamın müdafiəçiləri' tərəfindən polis bölməsində işgəncə ilə öldürülən gənc qadını xatırlayın.) Məktəb şagirdlərinə hicabın məcburi şəkildə geyindirilməsi onların ailələri tərəfindən tətbiq olunan zorakılıqdan başqa bir şey deyil. Əgər bunu qanuniləşdirsək, onda hansı maneə var ki, 9 yaşında evliliyi də qanuniləşdirək, əgər hansısa ağlını itirmiş ailə belə qərar versə və bunun İslam doktrinasına uyğun olduğunu düşünsə? Bəli, son illərdə İran Gürcüstanda radikal İslamın yayılması üçün hər cür cəhd göstərir, bu istiqamətdə fəaliyyət göstərən 'dini' və 'təhsil' müəssisələrini maliyyələşdirir. Bəli, mən bu maliyyələşmənin qarşısını almaq, həqiqi İslamla heç bir əlaqəsi olmayan bu qurumları bağlamaq və iranlı agentləri zərərsizləşdirmək niyyətindəyəm. 'Vahid Milli Hərəkat' bizim dövlətçiliyimizin qurucusu olan partiyadır və onun namizədləri heç vaxt pro-İran və ya pro-Zanzibar olmayıblar. Onlar hər zaman Gürcüstan dövlətinin tərəfdarı olublar və belə olaraq qalırlar" , - deyə Mixeil Saakaşvili qeyd edib.

www.24news.ge

Saakaşvili Gürcüstan azərbaycanlılarını sevdiyini bildirib, hicabla bağlı yenidən sərt mövqe sərgiləyib

Digər xəbərlər