Gürcüstanda ilk dəfə 400 metrdən uzun körpü inşa edilir (FOTO)

Regional İnkişaf və İnfrastruktur Nazirliyinin Avtomobil Yolları Departamentinin məlumatına görə, Kveşeti-Kobi yeni avtomobil yolunun tikintisi çərçivəsində uzunluğu 400 metrdən çox, hündürlüyü isə dərənin dibindən 166 metr olan tağlı körpünün inşası intensiv şəkildə davam etdirilir. 24News.ge xəbər verir ki, tağlı körpü layihənin ən mürəkkəb mühəndis qurğularından biridir. Tağın iki hissəsinin birləşdirilməsi işlərinin oktyabrın sonunadək başa çatdırılması planlaşdırılır. Tağın tikintisi tamamlandıqdan sonra körpünün dayaqları, daha sonra isə körpü aşırımının konstruksiyası quraşdırılacaq. Kveşeti-Kobi layihəsi çərçivəsində 23 kilometrlik, iki zolaqlı asfalt-beton yolun, 5 yeni körpünün və 5 tunelin inşası, həmçinin mövcud körpülərdən birinin bərpası nəzərdə tutulur. Beş yeni körpüdən dördündə tikinti işləri davam edir, birinin inşası isə artıq başa çatıb. Layihə çərçivəsində uzunluğu 9 kilometr olan əsas və eyni uzunluqda təxliyə tunellərinin qazılması tamamlanıb. Əsas tuneldə havalandırma panellərinin hazırlanması, təxliyə tunelində isə dəmir-beton üzlüyün çəkilməsi başa çatdırılıb. Hazırda tunellərdə elektromexaniki sistemlərin quraşdırılması işləri aparılır. Bundan əlavə, uzunluğu 1,5 kilometr və 500 metr olan tunellərin qazılması və dəmir-betonla üzlənməsi də tamamlanıb. Yeni yol Kobi istiqamətində hərəkətin təhlükəsizliyini və etibarlılığını artıracaq, qış aylarında yolun hərəkət üçün bağlanması probleminin həllinə kömək edəcək. Təxminən 10 kəndin sakinlərinin ilboyu rahat hərəkət etməsi və zəruri xidmətlərə çıxış imkanlarının yaxşılaşdırılması da gözlənilir. Layihə Gürcüstanın dövlət büdcəsi, Asiya İnkişaf Bankı (ADB) və Avropa Yenidənqurma və İnkişaf Bankının (EBRD) dəstəyi ilə həyata keçirilir. Layihənin ümumi dəyəri 1,2 milyard lari təşkil edir.

www.24news.ge

Gürcüstanda ilk dəfə 400 metrdən uzun körpü inşa edilir (FOTO)

Digər xəbərlər