Papuaşvili Aİ-ni tənqid etdi: “Brüssel məğlub olmuş inqilabi ssenariyə xidmət etməyə çalışır”

Parlamentin sədri Şalva Papuaşvili Avropa İttifaqının Gürcüstandakı vəziyyətlə bağlı tənqidlərinə cavab verib və Brüsseli “yalan narrativlərə” söykənməkdə ittiham edib. 24News.ge xəbər verir ki, Papuaşvili bu barədə Aİ-nin BMT-dəki nümayəndəsinin müavini Mişel Servonenin Gürcüstanda vətəndaş cəmiyyəti təşkilatlarına qarşı məhkəmə sistemindən siyasi motivlərlə istifadə olunması və repressiv tədbirlərin tətbiqi ilə bağlı açıqlamasını şərh edərkən bildirib. Papuaşvilinin sözlərinə görə, Aİ nümayəndəsinin açıqlaması “böhtandır” və Brüssel iki il əvvəl Gürcüstana və beynəlxalq ictimaiyyətə təqdim etməyə çalışdığı “yanlış narrativdən” hələ də uzaqlaşmayıb. “Yalan narrativə yapışmaq Brüsselin xarici siyasətinin mahiyyətini göstərir. Onlar hələ də Gürcüstanda məğlub olmuş inqilabi ssenariyə xidmət etməyə çalışırlar. Brüssel bu illüziyalardan çıxmalıdır”, – deyə parlament sədri bildirib. O, Aİ-ni Gürcüstana qarşı “aqressiv ritorikadan” və “dezinformasiyanın yayılmasından” imtina etməyə çağırıb. Papuaşvili həmçinin 4 oktyabr hadisələrinə toxunaraq, həmin vaxt prezident sarayına hücum cəhdinin Brüsselin “təhriki” ilə baş verdiyini iddia edib. Onun sözlərinə görə, Aİ-nin rəsmi nümayəndəsinin 4 oktyabr aksiyasına dəstək ifadə etməsi iştirakçılar üçün “virtual yaşıl işıq” olub. Parlament sədri bildirib ki, 4 oktyabr hadisələrindən sonra baş verən zorakılıqlar üzrə şəxslər məsuliyyətə cəlb olunub və Brüsselin bu hadisələrlə bağlı mövqeyini dəyişməli olduğunu düşünür. Qeyd edək ki, Aİ-nin BMT-dəki daimi nümayəndəsinin müavini Mişel Servone d’Ursu daha əvvəl BMT İnsan Hüquqları Şurasında çıxışı zamanı Gürcüstanda vətəndaş cəmiyyəti, müxalifət, hüquq müdafiəçiləri və müstəqil mediaya qarşı repressiv tədbirlərdən narahatlığını ifadə edib. Aİ Gürcüstanı fundamental azadlıqları qorumağa və son dövrdə qəbul edilmiş, insan hüquqları standartlarını zəiflətdiyi bildirilən qanunvericiliyə yenidən baxmağa çağırıb.

www.24news.ge

Papuaşvili Aİ-ni tənqid etdi: “Brüssel məğlub olmuş inqilabi ssenariyə xidmət etməyə çalışır”

Digər xəbərlər