Polşa Gürcüstan və digər bir neçə ölkə vətəndaşları üçün iş məqsədli giriş qaydalarını sərtləşdirib

Polşa Gürcüstan, Kolumbiya və Venesueladan işləmək məqsədilə ölkəyə gedən vətəndaşlar üçün giriş qaydalarını sərtləşdirib. 24News.ge xəbər verir ki, yeni qaydalar avqustun 15-dən qüvvəyə minib və konkret olaraq Polşaya işləmək məqsədilə daxil olan şəxslərə şamil olunur. Qeyd olunur ki, bu üç ölkənin vətəndaşları turist səfərləri və digər icazə verilən qısamüddətli səfərlər üçün Polşaya vizasız daxil olmaq imkanını saxlayırlar. Lakin iş məqsədilə ölkəyə səfər edənlər üçün artıq müvafiq viza tələb olunur. Avqustun 15-dən əvvəl Polşaya iş məqsədilə daxil olan şəxslər üçün isə keçid qaydaları tətbiq edilir. Polşa hakimiyyəti yeni məhdudiyyətlərin tətbiqini bu üç ölkənin vətəndaşlarının vizasız gediş-gəliş rejimindən qanuni tələbləri yerinə yetirmədən işləmək üçün istifadə etməsi ilə əlaqələndirir. Rəsmi şəxslərin sözlərinə görə, qərarın əsas səbəbləri arasında qanunsuz əmək fəaliyyəti və ölkədə qanunsuz qalma, kölgə iqtisadiyyatının genişlənməsi, işçilərin istismarı və insan alveri riskləri var. Həmçinin Gürcüstan, Kolumbiya və Venesuela miqrasiya baxımından yüksək riskli ölkələr kimi qiymətləndirilir. Qeyd edək ki, Polşada Gürcüstan vətəndaşlarının sadələşdirilmiş işə qəbul prosedurundan istifadəsi də 2025-ci ilin dekabrından dayandırılıb və onlar standart iş icazəsi və D kateqoriyalı milli viza prosedurundan keçməlidirlər.

www.24news.ge

Polşa Gürcüstan və digər bir neçə ölkə vətəndaşları üçün iş məqsədli giriş qaydalarını sərtləşdirib

Digər xəbərlər