Gürcüstanda “Yeni tanışlıqlar və xoş xatirələr” adlı yay düşərgəsinə start verilib (FOTO)

Azərbaycan Respublikasının Diasporla İş üzrə Dövlət Komitəsinin dəstəyi və həyata keçirdiyi layihələr çərçivəsində, Gürcüstanın Qurcaani bələdiyyəsinin Qaçreti qəsəbəsində “Parlaq Gələcək” Kitab Evinin təşkilatçılığı ilə “Gürcüstanlı gənclərin yeni tanışlıqlar və xoş xatirələr” adlı yay düşərgəsinə start verilib. 24News.ge xəbər verir ki, Tədbir iştirakçıları ilk olaraq Tbilisidəki Heydər Əliyev Parkını ziyarət ediblər. Azərbaycan xalqının Ümummilli Lideri Heydər Əliyevin parkda ucaldılmış büstü önünə əklil və qızılgüllər düzülüb, onun əziz xatirəsi dərin ehtiramla yad edilib. 17–20 avqust tarixlərini əhatə edən düşərgənin əsas məqsədi Gürcüstanda yaşayan azərbaycanlı və gürcü gənclərin bir araya gəlməsinə, onların milli-mədəni dəyərlərimizi daha yaxından tanımasına, dünyagörüşünün genişlənməsinə, yeni dostluq münasibətlərinin qurulmasına və asudə vaxtlarının səmərəli təşkilinə şərait yaratmaqdır. Düşərgənin açılış mərasimində təşkilatçı Rafail Süleymanov iştirakçıları salamlayaraq gənclərin düşərgə müddətində yeni bilik və bacarıqlar əldə edəcəklərinə, yeni dostluqlar quracaqlarına və buradan xoş xatirə və zəngin təəssüratlarla ayrılacaqlarına əminliyini ifadə edib. Azərbaycan Respublikasının Diasporla İş üzrə Dövlət Komitəsinin məsul əməkdaşı Sabit Məmmədov çıxış edərək Komitənin sədri Fuad Muradovun salamlarını düşərgə iştirakçılarına çatdırıb. O, gənclərə düşərgə günlərini səmərəli, mənalı və xoş keçirməyi arzulayıb, bu cür layihələrin gənclərin milli kimliyinin, həmrəylik və birlik duyğularının möhkəmləndirilməsi baxımından əhəmiyyətini qeyd edib. Sabit Məmmədov çıxışında Azərbaycan dövlətinin xaricdə yaşayan soydaşlarımıza, xüsusilə də gənclərə göstərdiyi diqqət və qayğıdan bəhs edib. S. Məmmədov bildirib ki, Azərbaycan Respublikasının Prezidenti İlham Əliyevin diaspor siyasətinə göstərdiyi xüsusi diqqət və qayğı nəticəsində dünyanın müxtəlif ölkələrində yaşayan soydaşlarımızın Azərbaycanla əlaqələrinin möhkəmləndirilməsi, milli kimliyinin və mədəni irsinin qorunması, gənc nəslin azərbaycançılıq ideyaları ətrafında birləşməsi istiqamətində mühüm layihələr həyata keçirilir. O, Gürcüstanda yaşayan azərbaycanlıların da Azərbaycan diaspor siyasətində mühüm yer tutduğunu, burada yaşayan soydaşlarımızın öz ana dilini, milli-mənəvi dəyərlərini, adət-ənənələrini qoruyub yaşatmasının böyük əhəmiyyət daşıdığını vurğulayıb. Qeyd edib ki, xüsusilə gənclərin Azərbaycanla əlaqələrinin daha da gücləndirilməsi, onların milli kimliyinə bağlı, savadlı, fəal və yaşadıqları ölkənin ictimai həyatında layiqli yer tutan vətəndaşlar kimi yetişməsi diqqət mərkəzindədir. Komitənin məsul əməkdaşı Elvin Əsgərov da çıxış edərək yay düşərgələrinin gənclərin inkişafında, onların bir-birini daha yaxından tanımasında, milli-mənəvi dəyərlərə bağlılığının gücləndirilməsində və yeni dostluq əlaqələrinin qurulmasında mühüm rol oynadığını bildirib və iştirakçılara uğurlar arzulayıb. Bu baxımdan Gürcüstanda yaşayan azərbaycanlı gənclər üçün təşkil edilən belə düşərgələr onların Azərbaycanla mənəvi bağlarının möhkəmlənməsinə, milli-mədəni irsimizi daha yaxından öyrənməsinə, eyni zamanda yaşadıqları Gürcüstan cəmiyyətinə fəal inteqrasiyasına və Azərbaycan–Gürcüstan dostluğunun gələcək nəsillər arasında daha da möhkəmlənməsinə xidmət edir. Yor-Muğanlı İctimai Məktəbinin müəllimi Ekaterine Kaftuaşvili çıxışında Yor-Muğanlıdakı Azərbaycandilli məktəbdə artıq altı ildən çoxdur çalışdığını diqqətə çatdırıb. O bildirib ki, belə düşərgələrin və gənclər arasında keçirilən birgə tədbirlərin Azərbaycan və gürcü xalqları arasında mövcud olan dostluq münasibətlərinin, xüsusilə də gənc nəsil arasında qarşılıqlı anlaşma və hörmətin daha da dərinləşməsinə mühüm töhfə verəcəyinə inanır. Düşərgə çərçivəsində gənclər üçün müxtəlif maarifləndirici, intellektual və əyləncəli fəaliyyətlər də təşkil olunub. İsmixan Məmmədovun rəhbərliyi ilə iştirakçılara komanda halında işləmək, əməkdaşlıq etmək və birgə qərar qəbul etmək bacarıqlarının inkişafına yönəlmiş təlim keçirilib. Gənclər komandalara bölünərək hər komanda üçün ad, loqo və şüar müəyyənləşdiriblər. Bununla yanaşı, iştirakçıların Azərbaycan tarixi, milli-mədəni irsi və ümumi dünyagörüşü üzrə biliklərini yoxlamaq və zənginləşdirmək məqsədilə müxtəlif zehni və intellektual oyunlar təşkil olunub. Komandalar arasında keçirilən yarışlar gənclərin həm biliklərini nümayiş etdirməsinə, həm də sağlam rəqabət, qarşılıqlı əməkdaşlıq və komanda ruhunun formalaşmasına şərait yaradıb. Düşərgə qarşıdakı günlərdə müxtəlif maarifləndirici görüşlər, komanda oyunları, intellektual yarışlar, mədəni proqramlar və gənclərin asudə vaxtının səmərəli təşkilinə yönəlmiş fəaliyyətlərlə davam edəcək.

www.24news.ge

Gürcüstanda “Yeni tanışlıqlar və xoş xatirələr” adlı yay düşərgəsinə start verilib (FOTO)

Digər xəbərlər