Medvedev: Qərb Gürcüstandan Rusiyaya qarşı “silah” kimi istifadə edib

“Qərb Gürcüstandan Rusiyaya qarşı silah kimi istifadə edib”. 24News.ge xəbər verir ki, bunu Rusiya Təhlükəsizlik Şurası sədrinin müavini, Rusiyanın keçmiş prezidenti Dmitri Medvedev bildirib. Medvedev 2008-ci ilin avqustunda baş verən hadisələrin 18-ci ildönümü ilə bağlı açıqlamasında Rusiyanın Abxaziya və Cənubi Osetiyanı müdafiə etmək qərarını düzgün seçim kimi qiymətləndirib: “2008-ci ilin avqustunda baş verən faciəli hadisələrdən 18 il ötür. Bu hadisələr bir daha sübut edir ki, qondarma beynəlxalq ictimaiyyətin fikrini nəzərə almadan öz vətəndaşlarını və milli maraqları qorumaq ən doğru seçimdir. Abxaziya və Cənubi Osetiyanın müdafiəsi ilə bağlı qərar Qərbdə isterikaya səbəb oldu. Bizi təcrid və bunun nəticələri ilə hədələyirdilər. İndi anlayırıq ki, bu, qonşu dövlətlə münaqişə vasitəsilə Rusiyanın möhkəmliyinin ilk sınağı idi. Biz bu sınaqdan ləyaqətlə keçdik və bununla Abxaziya və Cənubi Osetiya xalqlarına uğurlu həyat və inkişaf imkanı yaratdıq. Ölkəmizi ən yüksək səslə qınayanlar isə bu gün Ukraynada başqalarının əli ilə uğursuz şəkildə mübarizə aparırlar”, – deyə Medvedev bildirib. Onun sözlərinə görə, NATO və Avropa İttifaqına üzvlük vədlərinə baxmayaraq, Qərbi əslində Gürcüstanın taleyi maraqlandırmayıb: “Qərb Gürcüstandan bizə qarşı geosiyasi mübarizədə düşünülməmiş bir vasitə kimi, bunun onun üçün sərfəli olduğu məqamda istifadə etdi. Düşmənlərimiz heç nəyə nail ola bilməyəcəklərini başa düşdükdə isə Gürcüstanı taleyin ümidinə buraxdılar”, – deyə Medvedev qeyd edib. Medvedev hazırda Tbilisinin praqmatik siyasət yürütdüyünü bildirib: “Deyə bilmərəm ki, Gürcüstan yaşadığı şokdan tam sağalıb. Lakin nəticələr çıxarılıb. Bu gün Tbilisi praqmatik siyasət yürüdür. Bununla belə, kriminal rejimin əməllərinin vurduğu zərərin təsiri uzun müddət hiss olunacaq”, – deyə o bildirib. Rusiyanın keçmiş prezidenti Qərbin siyasətinin rusofobiyaya və Rusiyanı məhv etmək istəyinə əsaslandığını da iddia edib. Medvedev Ukrayna Prezidenti Volodimir Zelenski və Gürcüstanın keçmiş prezidenti Mixeil Saakaşvili barədə də danışıb: “Belə mübarizədə alçaq adamlara mərc edilməsi təəccüblü deyil. Avropalı riyakarlar quldurları, qatilləri və terrorçuları işə götürürlər. Bu yararsız insanlar isə həm axmaq, həm də ambisiyalıdırlar. Onları idarə etmək və daha sonra onlardan yaxa qurtarmaq asandır. Vəziyyət çıxılmaz həddə çatdıqda maliyyə kanallarını bağlamaq və onlardan açıq şəkildə uzaqlaşmaq kifayətdir. Saakaşvilinin taleyini xatırlayaq. Onun və Kiyevdəki narkomanın kimi rüsvayçı şəxslər kollektiv Qərb üçün istifadə olunan materialdır. Keçmiş gürcü rəhbərinin nəyə çevrildiyi və himayədarlarının ona necə münasibət göstərdiyi hamıya məlumdur. İndi o, son dərəcə acınacaqlı mənzərədir. Kiyevdəki qanlı təlxək də bundan yaxşı deyil və öz yazıq “karyerasının” sonuna doğru sürətlə irəliləyir”, – deyə Medvedev bildirib.

www.24news.ge

Medvedev: Qərb Gürcüstandan Rusiyaya qarşı “silah” kimi istifadə edib

Digər xəbərlər