İran Körfəz ölkələrini hücumla bağlı xəbərdarlıq edib

İran Körfəz ölkələri ilə intensiv diplomatik danışıqlara başlayıb və xəbərdarlıq edib ki, onlar ABŞ Prezidenti Donald Trampı İrana qarşı zərbələri dayandırmağa və danışıqlar yolunu seçməyə inandıra bilməsələr, Tehran həmin ölkələrin neft, enerji və su infrastrukturuna zərbələr endirəcək. 24News.ge xəbər verir ki, “Reuters”in məlumatlı mənbələrə istinadən yaydığı xəbərə görə, İranın xəbərdarlığı ABŞ-ın yaxın ərəb müttəfiqlərinin enerji obyektləri, neft yataqları, emal zavodları, elektrik şəbəkələri, su infrastrukturu, nəqliyyat şəbəkələri və digər strateji obyektlərinə mümkün hücumları əhatə edir. Məlumata görə, İran bu mesajı Donald Trampın iyulun 28-də İranın enerji şəbəkəsi və infrastrukturuna zərbə endirməyin mümkün olduğunu bildirməsindən sonra yayıb. İranın xarici işlər naziri Abbas Əraqçi məsələ ilə bağlı Səudiyyə Ərəbistanı, Türkiyə və Qətərin xarici işlər nazirləri, eləcə də Pakistanın ordu komandanı ilə telefon danışıqları aparıb. “Reuters”in mənbələrinin bildirdiyinə görə, Əraqçi Körfəz ölkələrini Trampa təsirlərindən istifadə edərək onun yeni hücumlara başlamasına mane olmağa çağırıb. İran tərəfinin mesajının bütün danışıqlarda eyni olduğu bildirilib: Tehran cavab tədbirlərinə hazırdır, lakin genişmiqyaslı eskalasiyanın və regionda dağıntıların qarşısını almağın ən yaxşı yolunun diplomatik həll olduğunu düşünür. Körfəz ölkələrindən birinin nümayəndəsi bildirib ki, İranın xəbərdarlığı birmənalı olub: ABŞ İranın infrastrukturuna zərbə endirərsə, Tehran buna cavab olaraq Körfəz ölkələrinin enerji obyektlərinə və digər regional hədəflərə hücum edəcək. Mənbələrin məlumatına görə, daha sonra Səudiyyə Ərəbistanının vəliəhd şahzadəsi Donald Trampla telefonla danışaraq hərbi əməliyyatların təxirə salınmasına, danışıqların bərpa edilməsinə və atəşkəsə çağırıb. Səudiyyə Ərəbistanı Vaşinqtona diplomatik həll yolunu dəstəklədiyini bildirib. Bununla yanaşı, Ər-Riyad öz ərazisinə hücum ediləcəyi təqdirdə cavab verəcəyini də vurğulayıb.

www.24news.ge

İran Körfəz ölkələrini hücumla bağlı xəbərdarlıq edib

Digər xəbərlər