Təhsil naziri universitetlərdə yeni maliyyələşmə modeli ilə bağlı yayılan məlumatlara aydınlıq gətirib

Təhsil, Elm və Gənclər naziri Givi Miqanadze dövlət universitetlərində yeni maliyyələşmə modeli ilə bağlı yayılan bəzi məlumatların yanlış olduğunu bildirib. 24News.ge xəbər verir ki, nazirin sözlərinə görə, 100 faizlik dövlət maliyyələşməsi üçün yüksək akademik göstəricilərin tələb olunduğu barədə yayılan məlumatlar həqiqəti əks etdirmir. Miqanadze bildirib ki, yeni modelə əsasən, dövlət universitetlərində təhsil alan tələbələrin ilk iki semestr ərzində təhsil haqqı tam olaraq dövlət tərəfindən qarşılanacaq. Lakin üçüncü semestrdən etibarən 100 faizlik maliyyələşməni davam etdirmək üçün tələbə əvvəlki semestrdə nəzərdə tutulan kreditlərin ən azı 80 faizini toplamalıdır. Nazirin açıqlamasına görə, tələbənin hər bir fəndən kredit əldə etməsi üçün minimum 51 faizlik nəticə göstərməsi kifayətdir. Qiymətin yüksək və ya aşağı olması əsas deyil, əsas şərt tələb olunan minimum nəticəni əldə etməkdir. Əgər tələbə 80 faizlik kredit tələbini yerinə yetirməzsə, dövlət onun təhsil haqqının 50 faizini maliyyələşdirməyə davam edəcək. Tələbəyə isə növbəti semestrdə əlavə fənlər götürərək lazımi kreditləri toplamaq və sonrakı dövrdə yenidən 100 faizlik maliyyələşməni bərpa etmək imkanı veriləcək. Nazir qeyd edib ki, yeni maliyyələşmə modeli Dünya Bankının ekspertləri ilə əməkdaşlıq çərçivəsində hazırlanıb və digər ölkələrin təcrübəsi nəzərə alınıb. Miqanadze həmçinin bildirib ki, tələbə bir dövlət universitetindən digər dövlət universitetinə keçərsə, qazandığı maliyyələşmə saxlanılacaq. Lakin tələbə özəl universitetə keçdikdə yeni model çərçivəsində dövlət maliyyələşməsi tətbiq olunmayacaq.

www.24news.ge

Təhsil naziri universitetlərdə yeni maliyyələşmə modeli ilə bağlı yayılan məlumatlara aydınlıq gətirib

Digər xəbərlər