Tbilisidə Əli Mehtiyevin bıçaqlanması ilə bağlı yeni təfərrüatlar məlum olub

Tbilisinin Vaşlicvari qəsəbəsində 15 yaşlı Əli Mehtiyev ağır şəkildə bıçaqlanıb. Hadisə ilə bağlı gəncin ailəsi qonşuları arasında yaranan mübahisənin sonda qanlı qarşıdurmaya çevrildiyini bildirib. 24News.ge xəbər portalına zərərçəkənin anası Sevinc Quliyeva bildirib ki, oğlu işdən gəldikdən sonra dostu ilə küçəyə çıxarkən 55 yaşlarında olan qonşusu ona təhqiramiz ifadələr işlədib. Onun sözlərinə görə, yaranan mübahisə zamanı qonşusu oğluna baş nahiyəsindən zərbə vurub. Daha sonra qarşıdurmaya həmin şəxsin 26 yaşlı oğlu da qoşulub. Sevinc Quliyeva bildirib ki, bu zaman oğlu Əliyə beş bıçaq zərbəsi endirib: "Oğlum işdən gəlib dostu ilə küçəyə çıxarkən 55 yaşlarında olan qonşumuz ona yaxınlaşaraq təhqiramiz ifadələr işlədib. Bu zaman oğlum ona cavab verib, bundan sonra həmin şəxs oğlumun başına toqqa ilə vurub. Oğlumla həmin şəxs arasında əlbəyaxa dava başlayıb. Bu vaxt kişinin 26 yaşlı oğlu da hadisəyə müdaxilə edib. Atası oğlumu saxladığı zaman Əliyə 5 bıçaq zərbəsi vurub. Oğlum onların əlindən zorla qaçaraq təxminən 400 metr aralıda yerə yıxılıb və 1 litrdən artıq qan itirib. Oğluma bel nahiyəsi, dalaq, ürəyinin alt hissəsi və ayaq nahiyəsindən bıçaq zərbələri vurulub. Hazırda oğlum reanimasiyadadır. Həkimlər onun vəziyyətini orta ağır qiymətləndirirlər", - deyə Sevinc Quliyeva vurğulayıb. Zərərçəkənin anası bildirib ki, sözügedən küçədə çox sayda azərbaycanlı ailə yaşayır və həmin şəxs daha əvvəl də burada yaşayan azərbaycanlılara qarşı xoşagəlməz ifadələr işlədib, onlarla yola getməyib. Daxili İşlər Nazirliyinin məlumatına əsasən, hüquq-mühafizə orqanları azyaşlının sağlamlığına qəsdən ağır xəsarət yetirməkdə təqsirləndirilən bir nəfəri saxlayıb. Polis cinayətin törədilməsində istifadə olunan bıçağı maddi sübut kimi götürüb. Faktla bağlı Cinayət Məcəlləsinin 117-ci maddəsinin 3-cü hissəsi ilə istintaq aparılır. Həmin maddə 13 ilədək azadlıqdan məhrumetmə cəzasını nəzərdə tutur.

www.24news.ge

Tbilisidə Əli Mehtiyevin bıçaqlanması ilə bağlı yeni təfərrüatlar məlum olub

Digər xəbərlər