Polis əməkdaşlarının zorakılıq əks olunan görüntüləri yayıldı, DİN hadisə ilə bağlı bəyanat verib (VİDEO)

Daxili İşlər Nazirliyi “TV Pirveli” telekanalının yaydığı və polis əməkdaşlarının törətdiyi zorakılıq faktını əks etdirən görüntülərlə bağlı açıqlama yayıb. 24News.ge xəbər verir ki, qurumun məlumatına görə, sözügedən cinayət faktı 2026-cı ilin fevral ayında DİN-in Baş Müfəttişliyi tərəfindən aşkar edilib. Toplanmış materiallar əsasında istintaq başlanılıb və fevralın 23-də Gürcüstan Prokurorluğu tərəfindən hadisədə iştirak edən üç polis əməkdaşı təqsirləndirilən şəxs qismində saxlanılıb. Nazirliyin açıqlamasında bildirilir ki, hadisə 2022-ci ilin yayında Acarıstanın Kobuleti şəhərində ezamiyyətdə olan İmereti Polis Departamentinin üç əməkdaşı tərəfindən törədilib. “TV Pirveli”nin yayımladığı anonsda polis əməkdaşlarının zorakılıq əməllərini əks etdirən görüntülər yer alıb. Telekanalın məlumatına əsasən, həmin videolar polis əməkdaşlarının özləri tərəfindən çəkilərək ümumi çat qrupunda paylaşılıb. DİN bəyan edib ki, telekanalın jurnalistləri üç polis əməkdaşının artıq saxlanılması barədə məlumatlı olsalar da, bu fakt anonsda qeyd edilməyib. Nazirlik bunu qurumun məqsədli şəkildə nüfuzdan salınmasına yönəlmiş addım kimi qiymətləndirib. Qeyd edək ki, məsələ ilə bağlı istintaq tədbirləri davam edir.

www.24news.ge

Polis əməkdaşlarının zorakılıq əks olunan görüntüləri yayıldı, DİN hadisə ilə bağlı bəyanat verib (VİDEO)

Digər xəbərlər