Gürcüstan Ümumdünya Səhiyyə Təşkilatının İcraiyyə Şurasına üzv seçilib

Gürcüstan Ümumdünya Səhiyyə Assambleyasının 79-cu sessiyasında Ümumdünya Səhiyyə Təşkilatının (ÜST) İcraiyyə Şurasına üzv seçilib. 24News.ge xəbər verir ki, bu barədə Gürcüstanın Səhiyyə Nazirliyi məlumat yayıb. Məlumata görə, ölkəni İcraiyyə Şurasında səhiyyə nazirinin birinci müavini İrakli Sasania təmsil edəcək. Nazirlik bildirir ki, İcraiyyə Şurası qlobal səhiyyə siyasətinin formalaşdırılmasında əsas rol oynayan ali idarəetmə orqanıdır. Şuraya üzvlük Gürcüstana beynəlxalq səhiyyə gündəliyinin müəyyənləşdirilməsi, strateji qərarların qəbulunda iştirak və qlobal çağırışların həllinə töhfə vermək imkanı yaradır. İrakli Sasania bildirib ki, ÜST-nin İcraiyyə Şurası təşkilatın əsas idarəedici qurumu olmaqla qlobal səhiyyə siyasətinin istiqamətlərini müəyyən edir. Onun sözlərinə görə, Gürcüstanın bu qurumda təmsil olunması ölkənin beynəlxalq səviyyədə tanınmasının göstəricisi olmaqla yanaşı, böyük məsuliyyət də daşıyır. Qeyd olunub ki, qərardan əvvəl Kopenhagendə keçirilən ÜST-nin Avropa Regional Komitəsinin 75-ci sessiyasında gizli səsvermə baş tutub. Təşkilata üzv 53 ölkənin nümayəndələrinin qərarı ilə İrakli Sasania Böyük Britaniya ilə birlikdə İcraiyyə Şurasına üzvlük üçün namizəd göstərilib. Namizədlərin yekun təsdiqi isə Cenevrədə keçirilən Ümumdünya Səhiyyə Assambleyasının 79-cu sessiyasında baş tutub və qərar rəsmi qüvvəyə minib. Məlumata əsasən, Gürcüstanın namizədliyinin irəli sürülməsi prosesində Səhiyyə Nazirliyi ilə yanaşı, Xarici İşlər Nazirliyi də fəal iştirak edib. ÜST-nin İcraiyyə Şurası üç il müddətinə seçilən 34 üzvdən ibarətdir. Şuranın əsas vəzifələri Ümumdünya Səhiyyə Assambleyasının qərarlarının icrasını təmin etmək, qlobal səhiyyə siyasəti üzrə tövsiyələr vermək və beynəlxalq səhiyyə gündəliyinin formalaşdırılmasında iştirak etməkdir.

www.24news.ge

Gürcüstan Ümumdünya Səhiyyə Təşkilatının İcraiyyə Şurasına üzv seçilib

Digər xəbərlər