2026–2027 tədris ili üçün birinci sinfə qeydiyyat müddətləri açıqlanıb

Təhsil, Elm və Gənclər Nazirliyi 2026–2027-ci tədris ili üçün dövlət məktəblərində birinci sinif şagirdlərinin qeydiyyat müddət və şərtlərini açıqlayıb. 24News.ge xəbər verir ki, birinci mərhələ üçün qeydiyyat 18 fevral tarixindən başlayır. Bildirilir ki, qeydiyyat beş mərhələdə həyata keçiriləcək: I mərhələ (18 fevral – 2 mart 2026) – xüsusi təhsil ehtiyacları olan uşaqların qeydiyyatı aparılacaq. Valideynlər müvafiq ərizə ilə məktəbə müraciət etməli, məktəb isə uşağı Təhsilin İdarəedilməsi İnformasiya Sistemində (EMIS) qeydiyyata alacaq. Xüsusi ehtiyac təsdiqləndikdən sonra uşağın məktəbə qəbulu təmin olunacaq. Bu mərhələdə qeydiyyatdan keçən uşaqlar üçün sənədlərin təqdim olunması və qəbul dövrü 4 mart – 17 aprel tarixlərini əhatə edir. II mərhələ (21 aprel – 8 may 2026) – bacı-qardaşı həmin məktəbdə oxuyan, valideyni məktəbdə çalışan və ya eyni ailədən birinci sinfə eyni vaxtda daxil olan uşaqlar qeydiyyatdan keçəcək. III mərhələ (15–25 may 2026) – ərazi prinsipi üzrə onlayn qeydiyyat EMIS portalı vasitəsilə həyata keçiriləcək. Sənədlərin qəbulu 27 may – 12 iyun tarixlərində aparılacaq. IV mərhələ (15 iyun – 3 iyul 2026) – ümumi onlayn qeydiyyat baş tutacaq. Sənədlərin qəbulu 6–17 iyul tarixlərində nəzərdə tutulub. Müəyyən edilmiş müddətdə sənədlər təqdim olunmazsa, qeydiyyat avtomatik ləğv ediləcək. V mərhələ (20–31 iyul 2026) – əvvəlki mərhələlərdə qeydiyyatdan keçə bilməyən və ya qeydiyyatını dəyişmək istəyən şagirdlər üçün nəzərdə tutulub. Birinci sinfə qəbul üçün tələb olunan sənədlərə qanuni nümayəndənin ərizəsi, şəxsiyyət və yaşayış sənədlərinin surətləri, uşağın doğum haqqında şəhadətnaməsi və ya şəxsiyyət sənədi daxildir. Xarici dildə olan sənədlərə rəsmi gürcü dilində tərcümə əlavə edilməlidir. Qeyd edək ki, qanunda edilən dəyişikliyə görə 2026–2027-ci tədris ilində 15 sentyabr tarixinədək 6 yaşı tamam olan uşaqlar birinci sinfə qəbul edilə biləcəklər. Qeyd olunur ki, bu ildən qeydiyyat prosesinə “ərazi prinsipi üzrə qeydiyyat” mərhələsi də əlavə olunub. Məqsəd uşaqların yaşayış yerinə yaxın məktəbdə təhsil alma imkanını artırmaqdır. Bu mərhələ qanun 12 şəhəri əhatə edir. Bunlar, Tbilisi, Kutaisi, Batumi, Rustavi, Poti, Zuqdidi, Telavi, Ambrolauri, Axalsixe, Ozurgeti, Mtsxeta və Qoridir.

www.24news.ge

2026–2027 tədris ili üçün birinci sinfə qeydiyyat müddətləri açıqlanıb

Digər xəbərlər