İrakli Qaribaşvili məhkəmə proseslərinin qapalı keçirilməsini siyasi təqib adlandırıb

Gürcüstanın sabiq baş naziri İrakli Qaribaşvili həbsxanadan növbəti məktubunu yayıb. 24News.ge xəbər verir ki, Qaribaşvili barəsində aparılan məhkəmə proseslərinin tamamilə qapalı keçirilməsini “kölgə ədalət mühakiməsi” və siyasi təqib kimi qiymətləndirib. Sabiq baş nazirin sözlərinə görə, hakimiyyətin bu qərarı ictimai nəzarəti aradan qaldırmaq, ona qarşı həyata keçirildiyini iddia etdiyi psixoloji təzyiq və şantaj faktlarını gizlətmək məqsədi daşıyır. Qaribaşvili bildirib ki, eyni kontekstdə və oxşar ittihamlarla bağlı digər şəxslərin məhkəmə prosesləri açıq keçirildiyi halda, onun işinin qapalı rejimə keçirilməsi ikili standartların və seçmə ədalət mühakiməsinin göstəricisidir. O, məhkəmədə özünə qarşı psixoloji təzyiq, şantaj, işgəncə, mənəvi əzab və siyasi fəaliyyətinə maneçilik törədilməsi barədə hakimə məlumat verdiyini qeyd edib. Qaribaşvili iddia edir ki, prokurorluq bu faktlarla bağlı araşdırma aparmaq əvəzinə, ona qarşı yeni ittiham irəli sürüb. Sabiq baş nazir həmçinin müdafiə tərəfinə şantaj məktubunu məhkəməyə təqdim etməyə icazə verilmədiyini və iş materiallarının bir hissəsinə çıxışın məhdudlaşdırıldığını bildirib: “Bu, saxta ədalət mühakiməsinin klassik nümunəsidir. Mənim gizlədəcəyim heç nə yoxdur. Buna görə də məhkəmə prosesinin açıq keçirilməsini tələb edirdim”, – deyə Qaribaşvili yazıb. O, baş verənləri cinayət işi deyil, siyasi motivli təqib və qisas prosesi kimi xarakterizə edib.

www.24news.ge

İrakli Qaribaşvili məhkəmə proseslərinin qapalı keçirilməsini siyasi təqib adlandırıb

Digər xəbərlər