Kobaxidze: "Azərbaycan və Gürcüstan ticarət və investisiyaları artırmağı hədəfləyir"

Azərbaycan və Gürcüstan arasında iqtisadi və enerji sahələrində əməkdaşlıq strateji tərəfdaşlığın əsas istiqamətlərindən biridir. İki ölkə mövcud əlaqələri daha da gücləndirməyi, ticarət dövriyyəsini artırmağı və yeni investisiya imkanları yaratmağı hədəfləyir. 24News.ge xəbər verir ki, bu barədə Gürcüstanın Baş naziri İrakli Kobaxidze Siqnaxi şəhərində Azərbaycan və Gürcüstan arasında İqtisadi Əməkdaşlıq üzrə Hökumətlərarası Komissiyanın 11-ci iclasında çıxışı zamanı bildirib. Baş nazir regionda baş verən geosiyasi dəyişikliklər fonunda Cənubi Qafqazda sülh və sabitliyin möhkəmləndirilməsinin, dinc yanaşı yaşama və dialoqun davam etdirilməsinin vacibliyini vurğulayıb. O, qonşu ölkələr arasında başlanmış sülh prosesini alqışladığını və bu istiqamətdə təşəbbüslərin davam etdiriləcəyinə ümidvar olduğunu bildirib. Kobaxidzenin sözlərinə görə, Azərbaycan və Gürcüstan arasında möhkəm münasibətlər və yüksək səviyyəli siyasi dialoq iqtisadi əməkdaşlığın potensialından daha geniş istifadə etməyə imkan verir. Tərəflərin əsas məqsədləri sırasında Gürcüstan məhsullarının ticarət potensialının artırılması, ticarət əlaqələrinin şaxələndirilməsi və investisiya fəaliyyətinin genişləndirilməsi yer alır. O, enerji sahəsində əməkdaşlığın iki ölkə arasındakı strateji münasibətlərin mühüm istiqamətlərindən biri olduğunu qeyd edib. Baş nazir bildirib ki, Bakı–Tbilisi–Ceyhan neft kəməri, Bakı–Tbilisi–Ərzurum qaz kəməri, Bakı–Supsa neft kəməri və Cənub Qaz Dəhlizi uzun illərdir enerji resurslarının tranzitinə və Avropanın enerji təhlükəsizliyinin təmin olunmasına töhfə verir. Kobaxidze, həmçinin Azərbaycanın iştirakı ilə həyata keçirilən yaşıl enerji layihəsinin əhəmiyyətinə toxunub. Layihənin əsas məqsədi bərpaolunan enerji resurslarının Cənubi Qafqaz vasitəsilə Avropa enerji bazarına nəqlini təmin etməkdir. Baş nazir iki ölkə arasında əməkdaşlığın müdafiə, mədəniyyət, təhsil, kənd təsərrüfatı, səhiyyə, turizm və ətraf mühit sahələrini də əhatə etdiyini bildirib. O, Gürcüstanın mövcud əlaqələri gücləndirməyə və yeni əməkdaşlıq istiqamətlərinin formalaşdırılmasına hazır olduğunu vurğulayıb. Kobaxidzenin sözlərinə görə, Anakliya dərin dəniz limanı və Tbilisinin yeni beynəlxalq hava limanı layihələri gələcəkdə Gürcüstanın tranzit və logistika imkanlarını daha da genişləndirəcək.

www.24news.ge

Kobaxidze: "Azərbaycan və Gürcüstan ticarət və investisiyaları artırmağı hədəfləyir"

Digər xəbərlər