4 oktyabr hadisələrinə görə məhkum olunan dörd nəfərlə prosessual razılaşma əldə edilib

4 oktyabr hadisələrinə görə məhkum olunan Murtaz Zodelava, Laşa Beridze, Quri Jvania və İrakli Çxvirkianın işləri üzrə prosessual razılaşma bağlanıb. 24News.ge xəbər verir ki, tərəflər arasında əldə olunan razılaşmanı hakim Mzia Lomtatidze təsdiqləyib. Hakimin qərarına əsasən, dörd nəfərin hamısı irəli sürülən ittihamlar üzrə təqsirli bilinib. Bugünkü məhkəmə iclasında onların hər biri ittihamı etiraf edib. “Qanuni nəticələri dərk edirəm, heç bir təzyiq olmayıb”, – deyə Murtaz Zodelava bildirib. Prosessual razılaşmaya əsasən, onların hər birinə 3 il 1 ay müddətinə azadlıqdan məhrumetmə cəzası verilib. Bu müddətin 1 il 1 ayını həbsxanada çəkəcəklər, 2 il isə şərti hesab olunacaq. Məhkumlardan Laşa Beridze və Murtaz Zodelavanın noyabrın 4-də, İrakli Çxvirkianın noyabrın 6-da, Quri Jvaniyanın isə noyabrın 16-da penitensiar müəssisəni tərk edəcəyi bildirilir. Məlumat üçün bildirək ki, Tbilisi Şəhər Məhkəməsinin əvvəlki hökmünə əsasən, 2025-ci il oktyabrın 4-də baş verən hadisələrin təşkilatçılarından Laşa Beridze və Murtaz Zodelavaya 7 il müddətinə azadlıqdan məhrumetmə cəzası verilmişdi. Murtaz Zodelavaya Gürcüstan Cinayət Məcəlləsinin 19-222-ci maddəsinin ikinci hissəsinin “a” bəndi ilə ittiham irəli sürülmüşdü. Həmin maddə qrup halında strateji və xüsusi əhəmiyyətli obyektləri ələ keçirməyə və bloklamağa cəhdi nəzərdə tutur. O, həmçinin Cinayət Məcəlləsinin 225-ci maddəsinin birinci hissəsi ilə – qrup zorakılığının təşkili və ona rəhbərlik etməkdə, eləcə də 317-ci maddə ilə – Gürcüstanın konstitusiya quruluşunun zorakılıq yolu ilə dəyişdirilməsinə və dövlət hakimiyyətinin devrilməsinə çağırış etməkdə ittiham olunmuşdu. Sonuncu maddə 9 ilədək azadlıqdan məhrumetmə cəzasını nəzərdə tutur. Laşa Beridzeyə isə Cinayət Məcəlləsinin 19-222-ci maddəsinin ikinci hissəsinin “a” bəndi ilə strateji və xüsusi əhəmiyyətli obyektləri qrup halında ələ keçirməyə və bloklamağa cəhd etmək, həmçinin 225-ci maddənin birinci hissəsi ilə qrup zorakılığını təşkil etmək və ona rəhbərlik etmək ittihamları irəli sürülmüşdü. İrakli Çxvirkia və Quri Jvaniyaya isə əvvəlki hökmlə 5 il müddətinə azadlıqdan məhrumetmə cəzası verilmişdi.

www.24news.ge

4 oktyabr hadisələrinə görə məhkum olunan dörd nəfərlə prosessual razılaşma əldə edilib

Digər xəbərlər