Tbilisidə Gürcüstan-Azərbaycan strateji tərəfdaşlığı müzakirə olunub (VİDEO)

Tbilisi şəhərində “Gürcüstan-Azərbaycan: Strateji tərəfdaşlıq və ortaq gələcək” mövzusunda dəyirmi masa keçirilib. 24News.ge xəbər verir ki, dəyirmi masa çərçivəsində Gürcüstan və Azərbaycan arasında strateji əməkdaşlığın mövcud vəziyyəti və perspektivləri, o cümlədən enerji əməkdaşlığı, nəqliyyat və logistika, Orta Dəhliz, ticarət və iqtisadi əlaqələr, eləcə də Cənubi Qafqazda regional əməkdaşlıq məsələləri müzakirə edilib. Azərbaycanın Gürcüstandakı səfiri Faiq Quliyev çıxışında qeyd edib ki, Azərbaycan və Gürcüstan arasında münasibətlər dərin tarixi köklərə, qarşılıqlı hörmətə və mehriban qonşuluq prinsiplərinə əsaslanır. Onun sözlərinə görə, tədbirin Tbilisidə keçirilməsi xüsusi rəmzi məna daşıyır. Səfir vurğulayıb ki, Azərbaycan və Gürcüstan xalqlarını birləşdirən ortaq tarixi dəyərlər və dövlətlər arasında mövcud olan strateji tərəfdaşlıq münasibətlərin inkişafında mühüm rol oynayır. F.Quliyev Azərbaycanın dövlət müstəqilliyinin bərpasının 35-ci ildönümünün də bu günlərdə qeyd olunduğunu xatırladıb. O bildirib ki, 18 oktyabr 1991-ci ildə Azərbaycan dövlət müstəqilliyinin bərpasını elan edib və bu əlamətdar tarixin Tbilisidə keçirilən tədbir çərçivəsində qeyd olunması xüsusi əhəmiyyət daşıyır. Səfir, həmçinin bu ilin noyabrında Azərbaycanın Gürcüstandakı səfirliyinin fəaliyyətə başlamasının 30 illiyinin qeyd ediləcəyini deyib. Onun sözlərinə görə, Azərbaycan 1996-cı ildə Tbilisidə Gürcüstandakı ilk səfirliyini açıb. F.Quliyev qeyd edib ki, Azərbaycan və Gürcüstan arasında diplomatik münasibətlərin ildönümü də iki ölkənin əlaqələrinin inkişaf tarixində mühüm yer tutur. Səfirin fikrincə, ortaq tarixi təcrübə, qarşılıqlı etimad və mehriban qonşuluq münasibətləri Azərbaycan–Gürcüstan strateji tərəfdaşlığının möhkəmlənməsi üçün mühüm əsasdır. Tədbirdə çıxış edən ekspertlər, jurnalistlər və təşkilat rəhbərləri də iki ölkə arasındakı münasibətlərin möhkəm təmələ əsaslandığını qeyd ediblər. Bildirilib ki, regionda baş verən proseslər və beynəlxalq münasibətlər sistemindəki dəyişikliklər Azərbaycan-Gürcüstan əməkdaşlığının yeni istiqamətlər üzrə inkişaf etdirilməsini zəruri edir. Mövzu ilə bağlı daha ətraflı əməkdaşlarımızın hazırladığı reportajı təqdim edirik:

www.24news.ge

Tbilisidə Gürcüstan-Azərbaycan strateji tərəfdaşlığı müzakirə olunub (VİDEO)

Digər xəbərlər