Tramp İranın sülh təklifini rədd etdiyini təsdiqlədi

ABŞ Prezidenti Donald Tramp İran tərəfindən təqdim olunan sülh təklifini rədd etdiyini təsdiqləyib. 24News.ge xəbər verir ki, Tramp bu barədə “Axios” portalına açıqlamasında danışıb. “Onlar (iranlılar) təklif irəli sürdülər və mən onu rədd etdim”, – deyə ABŞ Prezidenti bildirib. “Axios”un məlumatına görə, İran ABŞ-la mümkün danışıqların əsasən Hörmüz boğazı və ABŞ-ın tətbiq etdiyi dəniz blokadasına yönəlməsini istəyir. Tramp administrasiyası isə İranın, xüsusilə də nüvə proqramı ilə bağlı məsələdə güzəştlərə getməsini tələb edir. ABŞ rəsmilərindən birinin sözlərinə görə, əvvəlki kimi hazırda da ABŞ və İran arasında vasitəçilər üzərindən “müsbət və konstruktiv” müzakirələr davam edir. Bildirilir ki, danışıqlarda nüvə məsələsi də müzakirə olunur. Məlumata görə, İran ABŞ-a təklif edib ki, Vaşinqton dəniz blokadasını aradan qaldırsın, İran neftinin satışına tətbiq olunan sanksiyaları ləğv etsin və regionda atəşkəs rejimini bərpa etsin. Bunun qarşılığında Tehran bir həftə ərzində Hörmüz boğazını açmağa və nüvə proqramı ilə bağlı danışıqları bərpa etməyə hazır olduğunu bildirib. “Axios”un mənbələrindən birinin sözlərinə görə, sentyabrın 22-də keçirilən danışıqlar zamanı ABŞ tərəfinin nümayəndələri İran nümayəndə heyətinə açıq şəkildə bildiriblər ki, İran Hörmüz boğazına nəzarət etmir və bu səbəbdən boğazla bağlı tələblər irəli sürə bilməz.

www.24news.ge

Tramp İranın sülh təklifini rədd etdiyini təsdiqlədi

Digər xəbərlər