Süni intellekt agenti dövlət səhiyyə portalına daxil olub – Avstraliya araşdırma başladıb

Avstraliya hökuməti OpenAI tərəfindən hazırlanmış süni intellekt agentinin iyun ayında hökumətə məxsus səhiyyə məlumatları portalına icazəsiz giriş əldə etdiyini açıqlayıb. 24News.ge xəbər verir ki, Reuters-in məlumatına görə, süni intellekt agenti Avstraliyanın universal tibbi sığorta sistemi olan Medicare-in tibbi statistika portalına giriş əldə edib. Hadisənin ictimai səhiyyə xərcləri ilə bağlı araşdırma aparılarkən baş verdiyi bildirilir. Bu hadisə süni intellekt agentinin dövlət veb-saytına müdaxilə etdiyi ilk məlum hal ola bilər. Avstraliyanın Baş naziri Entoni Albanese bildirib ki, hazırda əldə olunan sübutlar hökumət şəbəkəsinin daha geniş miqyasda ələ keçirilmədiyini göstərir: “Hazırda mövcud olan sübutlar şəbəkənin daha geniş miqyasda komprometasiya edilmədiyini göstərir. Buna baxmayaraq, bu vəziyyət açıq şəkildə qəbuledilməzdir”, – deyə Albanese Nyu-Yorkda jurnalistlərə bildirib. Baş nazirin sözlərinə görə, hadisə ilə bağlı araşdırma davam edir və Avstraliya hökuməti OpenAI-nin baş direktoru Sem Altmanla məsələ bağlı “son dərəcə ciddi narahatlığını” ifadə edib. Albanese həmçinin şirkətin hadisə barədə Avstraliya hökumətinə məlumat verməsini gecikdirməsindən narazı olduğunu bildirib. Onun sözlərinə görə, hökumət hadisə barədə yalnız 10 sentyabrda məlumat alıb. Araşdırma çərçivəsində hökumət sistemlərinin pozuntunu ilkin mərhələdə niyə aşkar edə bilmədiyinin də müəyyənləşdirilməsi gözlənilir. Reuters qeyd edir ki, hadisə süni intellekt agentlərinin yaratdığı təhlükələrlə bağlı beynəlxalq narahatlığın artdığı bir vaxtda baş verib. Son dövrdə OpenAI, Anthropic, Google və Meta-nın süni intellekt sistemlərinin xarici sistemlərə çıxışı ilə bağlı müxtəlif insidentlər də açıqlanıb. Avstraliya hökuməti isə süni intellekt texnologiyalarının sürətli inkişafı fonunda təhlükəsizlik və insan nəzarətinin təmin edilməsinin vacibliyini vurğulayır.

www.24news.ge

Süni intellekt agenti dövlət səhiyyə portalına daxil olub – Avstraliya araşdırma başladıb

Digər xəbərlər