Ukrayna və İran xarici işlər nazirləri görüşüb

Ukraynanın və İranın xarici işlər nazirləri Andrey Sibiqa və Abbas Əraqçi BMT Baş Assambleyasının 81-ci sessiyası çərçivəsində görüşüblər. 24News.ge xəbər verir ki, Andrey Sibiqa sosial şəbəkə hesabında bildirib ki, görüş zamanı Ukrayna ilə İran arasında gərginliyin daha da artmasının qarşısının alınması üçün atılmalı addımlar müzakirə olunub. Onun sözlərinə görə, tərəflər mövcud kommunikasiya kanallarının açıq saxlanılması barədə razılığa gəliblər: “İyul ayında telefon danışığımızdan sonra Abbas Əraqçi ilə BMT Baş Assambleyasının 81-ci sessiyası çərçivəsində görüşdüm. Diplomatiya, hətta çətin vəziyyətlərdə belə, birbaşa dialoq aparmaq deməkdir. Söhbətimiz ölkələrimiz arasında gərginliyin daha da artmasının qarşısını almaq üçün qarşılıqlı addımlara həsr olunub. Mövcud kommunikasiya kanallarının açıq saxlanılması barədə razılaşdıq”, – deyə Sibiqa bildirib. Ukraynalı nazir qeyd edib ki, görüş zamanı Yaxın Şərq və Avropadakı vəziyyət, həmçinin davam edən sülh səylərinin müxtəlif istiqamətləri barədə fikir mübadiləsi aparılıb. Sibiqa əlavə edib ki, Abbas Əraqçiyə Ukraynanın hər iki regionda sülh və sabitliyin daha sürətli bərpasını dəstəkləyən mövqeyini bir daha çatdırıb.

www.24news.ge

Ukrayna və İran xarici işlər nazirləri görüşüb

Digər xəbərlər