Üzümçülər aşağı alış qiymətinə görə etiraz aksiyası keçiriblər

Kvareli bələdiyyəsinin Axalsopeli kəndində üzümçülər aksiya keçirirlər. 24News.ge xəbər verir ki, aksiya iştirakçıları yerli müəssisələrdən birinin qarşısına toplaşaraq üzümün aşağı qiymətə qəbul edilməsinə etiraz ediblər. Fermerlər bildirirlər ki, mövcud qiymət onların çəkdiyi xərcləri belə qarşılamır. Onlar etiraz aksiyasını dayandırmaq niyyətində olmadıqlarını qeyd edirlər. “Biz bu üzümləri 30 tetriyə təhvil verə bilmərik”, – deyə fermerlərdən biri bildirib. Aksiya keçirilən ərazidə Milli Şərab Agentliyinin rəhbəri Levan Muxuzla da iştirak edir. Agentliyin rəhbərinin sözlərinə görə, dövlət müvafiq kondisiyaya malik Saperavi sortu üzrə üzümü 1,50 lariyə, digər üzüm sortlarını isə 1,30 lariyə qəbul edəcək. Levan Muxuzla bildirib ki, qiymətlərin fərqləndirilməsində məqsəd fermerləri üzüm bağlarına daha yaxşı qulluq etməyə təşviq etməkdir. Onun sözlərinə görə, özəl sektorla qiymətlərlə bağlı danışıqlar aparmaq da mümkündür. “Biz ilin əvvəlində qəbul edilmiş qərarın şərtlərinə uyğun hərəkət edirik. Məqsəd əhalinin üzümü məhsul yığımı dövründə lazımi kondisiyaya çatdırmasını maksimum dərəcədə təmin etməkdir. Açıq şəkildə deyirəm ki, şəkərliliyi 17 faizə qədər olan məhsulu üzüm hesab etmirik. Dövlət Saperavi sortunu 1,50 lariyə, digər uyğun keyfiyyətli şərablıq üzüm sortlarını isə 1,30 lariyə qəbul edir”, – deyə Muxuzla bildirib. Muxuzla həmçinin bildirib ki, dövlət tərəfindən mümkün kompromislərlə bağlı aksiya iştirakçıları ilə texniki məsələlər və prosedurlar müzakirə olunur. Onun sözlərinə görə, şəkərliliyin müxtəlif üsullarla ölçülməsi kimi məsələlər üzrə danışıqlar aparmaq mümkündür. “Dövlət faktiki olaraq qiymətlərin minimum həddini müəyyən edir. Buna görə də qiymətdən narazıdırlarsa, özəl sektorla danışıqlar aparmaq həmişə mümkündür”, – deyə Milli Şərab Agentliyinin rəhbəri bildirib.

www.24news.ge

Üzümçülər aşağı alış qiymətinə görə etiraz aksiyası keçiriblər

Digər xəbərlər