Yaponiyada zəlzələdə ölənlərin sayı 13-ə çatıb

Yaponiyada yolların zədələnməsinə və binaların çökməsinə səbəb olan genişmiqyaslı zəlzələ nəticəsində ən azı 13 nəfərin həlak olduğu bildirilir. 24News.ge xəbər verir ki, bu barədə ölkənin Baş naziri Sanae Takaiçi məlumat verib. O, bildirib ki, bütün xidmətlər kömək gözləyən insanların xilas edilməsi istiqamətində fasiləsiz işləyir. Yaponiya Nazirlər Kabinetinin baş katibi Minoru Kiharanın sözlərinə görə, 7.1 maqnitudalı yeraltı təkanlar zamanı 7 nəfər ağır xəsarətlər alıb. O bildirib ki, 29 nəfər yüngül xəsarətlər alıb. Yerli KİV-in məlumatına əsasən, Kyuşu xəstəxanalarında onlarla yaralı var. Həmçinin 9 mindən çox insan təxliyə məntəqələrinə yerləşdirilib. Təxminən 36.9 min ev işıqsız, 84 minə yaxın mənzil və ev susuz, 9.5 min abonent isə qazsız qalıb. Kihara qeyd edib ki, təbii fəlakətin əsas zərbəsini öz üzərinə götürən Kumamoto prefekturasının bəzi ərazilərində rabitə kəsintiləri müşahidə olunur. Zəlzələnin fəsadlarının aradan qaldırılmasına özünümüdafiə qüvvələrinin təxminən 4.6 min hərbçisi cəlb edilib. 7.1 maqnitudalı bu zəlzələ son illər ərzində ölkədə qeydə alınan ən güclü təkanlardan biri olub. Yaponiyanın zəlzələ intensivliyi şkalasına əsasən, ayrılan enerjini deyil, təkanların səthdə necə hiss edildiyini göstərən bu yeraltı təkanlar maksimum 7 bal olaraq qiymətləndirilib.

www.24news.ge

Yaponiyada zəlzələdə ölənlərin sayı 13-ə çatıb

Digər xəbərlər