İmamcümə siyasətçilər tərəfindən dini dəyərlərlə bağlı səsləndirilən fikirlərə kəskin münasibət bildirib

Marneuli İmam Əli (ə) Məscidinin axundu və imamcümələrindən biri Hacı Hacıyev cümə xütbəsində son dövrlər sosial şəbəkələrdə və bəzi siyasətçilərin çıxışlarında dini şəxsiyyətlər və dini dəyərlərlə bağlı səsləndirilən fikirlərə münasibət bildirib. 24News.ge xəbər verir ki, din xadimi çıxışında seçki dövrlərində siyasi qüvvələrin dini inanclardan istifadə etdiyini, lakin sonradan bəzi siyasətçilərin həmin dəyərlərə hörmətsiz yanaşdığını bildirib. Hacı Hacıyevin sözlərinə görə, dini icmanın heç bir siyasi qüvvə ilə bağlılığı yoxdur və onların əsas dəyərləri dini əqidə, qarşılıqlı hörmət və dövlətə sədaqətdir: "Seçki zamanı gəlib xalqa yalan vədlər verirlər. Fərqi yoxdur, iqtidar olsun, ya da müxalifət. Sonra isə istifadə etdiyiniz bu xalqın dini inancına və əqidəsinə sosial şəbəkələrdə durmadan dil uzadırsınız. Bizim heç bir siyasi cərəyana bağlılığımız yoxdur. Bu, bizim məktəbimizdir, əqidəmizdir. Biz burada köklü xalqıq, yüz illərdir bu torpaqlarda yaşayırıq. Hər zaman dövlətimizə sadiq olmuşuq, dövlətçiliyimizin yanında dayanmışıq. Biz bu dövlətin hüquqlu vətəndaşlarıyıq və onun suverenliyini də biz istəyirik. İşğal altında olan torpaqlarının azad edilməsini də istəyir, onların həqiqi sahiblərinə qaytarılmasını arzu edirik. Biz burada qonaq deyilik. Şükür Allaha, nə bu dövlət, nə də dünya üçün təhlükə deyilik. Bu məktəb təhlükəsizlik, sülh və qarşılıqlı hörmət məktəbidir. Gedib bu məktəbin banilərinin həyatına baxın. Onlar hər zaman digər dinlərin nümayəndələrinin də hüquqlarını müdafiə ediblər. Məlumdur ki, bu cür addımların arxasında müəyyən maraqlar dayanır. İnanıram ki, bizim əzizlərimiz elə bir şərait yaratmayacaqlar ki, onların tamahı və maraqları həyata keçsin", - deyə Hacı Hacıyev qeyd edib.

www.24news.ge

İmamcümə siyasətçilər tərəfindən dini dəyərlərlə bağlı səsləndirilən fikirlərə kəskin münasibət bildirib

Digər xəbərlər