Marneulidə mərhum səfir Dursun Həsənovun xatirəsinə ehsan mərasimi keçirilib (VİDEO)

Azərbaycanın Gürcüstandakı keçmiş fövqəladə və səlahiyyətli səfiri Dursun Həsənovun vəfatı ilə əlaqədar Marneuli şəhərində ehsan mərasimi təşkil olunub. 24News.ge xəbər verir ki, mərasimdə Azərbaycanın Gürcüstandakı fövqəladə və səlahiyyətli səfiri Faiq Quliyev, mərhumun qardaşı – Azərbaycanın İspaniyadakı fövqəladə və səlahiyyətli səfiri Ramiz Həsənov, “SOCAR Energy Georgia” şirkətinin baş direktoru Mahir Məmmədov, Gürcüstan Müsəlmanları İdarəsinin şeyxi Hacı Faiq Nəbiyev, İdarənin Şərqi Gürcüstan üzrə müftisi Etibar Eminov, Gürcüstan parlamentinin üzvləri Zaur Darğallı və Savalan Mirzəyev, Marneuli meri Daur İsmayılov, Marneuli Bələdiyyə Məclisinin sədri Amiran Giorqadze, eləcə də çoxsaylı ictimaiyyət nümayəndələri iştirak ediblər. Tədbirdə Marneuli şəhərindəki İmam Əli (ə) məscidinin axundu və imam-cümələrdən Hacı Hacıyev müqəddəs Qurani-Kərimdən ayələr tilavət edərək mərhumun ruhuna dualar oxuyub. Daha sonra çıxış edən Hacı Hacıyev Dursun Həsənovun həyat və fəaliyyətindən bəhs edib, onun Azərbaycan-Gürcüstan əlaqələrinin inkişafına verdiyi töhfələri qeyd edib. O, həmçinin Həsənovlar ailəsinin Gürcüstandakı ictimai fəaliyyətinə, milli-mənəvi dəyərlərə bağlılığına və soydaşlarımız arasında qazandığı hörmətə diqqət çəkib. Ehsan süfrəsindən sonra mərasim iştirakçıları mərhumun ailə üzvləri və yaxınları ilə görüşərək onlara dərin hüznlə başsağlığı veriblər. Qeyd edək ki, Azərbaycanın Gürcüstandakı keçmiş fövqəladə və səlahiyyətli səfiri Dursun Həsənov iyunun 12-də Bakıda yaşadığı evdə vəfat edib. Allah rəhmət eləsin.

www.24news.ge

Marneulidə mərhum səfir Dursun Həsənovun xatirəsinə ehsan mərasimi keçirilib (VİDEO)

Digər xəbərlər