Avropa Parlamenti Gürcüstanla bağlı kəskin hesabat qəbul edib

Avropa Parlamenti Gürcüstanla bağlı hesabatı 436 lehinə, 145 əleyhinə səslə qəbul edib. 24News.ge xəbər verir ki, sənəd Avropa Komissiyası tərəfindən hazırlanan 2025-ci il Gürcüstan hesabatı əsasında tərtib olunub. Hesabatda Avropa Parlamenti demokratik geriləmə, artan repressiyalar, qanunsuz həbslər, təhdidlər və dezinformasiya fonunda Avropa və demokratik Gürcüstan uğrunda mübarizəni davam etdirən gürcü xalqı ilə tam həmrəylik ifadə edir. Sənəddə qeyd olunur ki, Gürcüstan əhalisinin təxminən 75 faizi ölkənin Avropa İttifaqına inteqrasiyasını dəstəkləməyə davam edir və Aİ-nin qapıları gürcü xalqı üçün açıq qalır. Parlament hesabatında hakim "Gürcü Arzusu" partiyasının ölkənin Avropa inteqrasiyası kursunu faktiki olaraq dəyişdirdiyi vurğulanır. Sənəddə Gürcüstana namizəd statusunun verilməsi üçün müəyyən edilmiş doqquz prioritet istiqamətin heç birində irəliləyişin olmadığı, əksinə geriləmənin müşahidə edildiyi qeyd edilir. Hesabatda 2024-cü ilin oktyabrında keçirilmiş parlament seçkilərinin saxtalaşdırıldığı iddia olunur və seçkilərdən sonra ölkədə avtoritar idarəçiliyə doğru hərəkətin daha da sürətləndiyi bildirilir. Avropa Parlamenti Gürcüstanın demokratik institutlarının, fundamental azadlıqlarının və siyasi plüralizminin məqsədli şəkildə zəiflədilməsindən ciddi narahatlığını ifadə edib. Sənəddə Mərkəzi Seçki Komissiyası, Rabitə Komissiyası, Ali Ədliyyə Şurası, Konstitusiya Məhkəməsi, Prokurorluq, Milli Bank və hüquq-mühafizə qurumları kimi mühüm institutların qərəzsizlik, müstəqillik və demokratik nəzarət baxımından problemlərlə üzləşdiyi vurğulanır. Avropa Parlamenti hesab edir ki, Gürcüstan demokratik islahatlar yoluna qayıtmadan, azad və ədalətli seçkilər keçirmədən, dövlət institutlarının müstəqilliyini təmin etmədən, oliqarxik təsiri azaltmadan və insan hüquqları ilə media azadlığının qorunmasını gücləndirmədən Aİ-yə üzvlük prosesində irəliləyiş əldə edə bilməyəcək. Hesabatda həmçinin Gürcüstanın sabiq baş naziri və hakim partiyanın fəxri sədri Bidzina İvanişvili, eləcə də “Gürcü Arzusu”nun rəhbər şəxsləri, hakimlər, prokurorlar və digər vəzifəli şəxslərə qarşı fərdi sanksiyaların tətbiqinin cəzasızlığa qarşı mühüm vasitə olacağı qeyd olunur. Avropa Parlamenti Aİ üzvü dövlətləri Bidzina İvanişviliyə, onun ailə üzvlərinə və şirkətlərinə qarşı hədəfli sanksiyalar tətbiq etməyə, aktivlərini dondurmağa və bu istiqamətdə digər tərəfdaşlarla əməkdaşlıq etməyə çağırıb. Sənəddə jurnalistlərin, insan hüquqları müdafiəçilərinin və müxalifət nümayəndələrinin təqib olunması pislənir, Aİ-nin indiyədək reaksiyasının qeyri-kafi olduğu vurğulanır və məsul şəxslərə qarşı ümumavropa səviyyəsində koordinasiyalı sanksiyaların tətbiqi tələb olunur. Avropa Parlamenti tərəfindən qəbul edilmiş Gürcüstan haqqında hesabata görə, Avro-Atlantik inteqrasiya yolundan imtina etdikdən sonra "Gürcü Arzusu" Çin, Rusiya və İranla əməkdaşlığa doğru strateji kurs götürür. Avropa Parlamenti bütün siyasi motivli saxlanılanların dərhal və qeyd-şərtsiz azadlığa buraxılmasına çağırır - həmçinin qeyd olunur ki, korrupsiya ilə bağlı etibarlı ictimai dəlillərə baxmayaraq, keçmiş baş nazir İrakli Qaribaşvilinin həbsi proseslərin ədalətli məhkəmə standartlarına cavab verib-verməməsi ilə bağlı ciddi narahatlıqlar doğurur. Bundan əlavə, Avropa Parlamenti Macarıstan hökumətini İvanişvili və “Gürcü Arzusu” rəhbərliyinə qarşı Aİ səviyyəsində sanksiyaların tətbiqinə mane olan mövqeyindən imtina etməyə çağırıb.

www.24news.ge

Avropa Parlamenti Gürcüstanla bağlı kəskin hesabat qəbul edib

Digər xəbərlər