DİQQƏT! İlan sancmaları ilə bağlı əhaliyə xəbərdarlıq edilib

Xəstəliklərə Nəzarət üzrə Milli Mərkəz əhaliyə ilan sancmaları zamanı görülməli tədbirlər və qorunma yolları ilə bağlı tövsiyələr yayıb. 24News.ge xəbər verir ki, mərkəzin məlumatına görə, ilan sancdıqdan sonra ilk növbədə sakitliyi qorumaq və dərhal təcili tibbi yardıma (112) müraciət etmək vacibdir. Zərərçəkən şəxs düz səth üzərində uzadılmalı, sancma əl nahiyəsindədirsə üzük və digər zinət əşyaları çıxarılmalı, ona bol maye verilməlidir. Həmçinin sancılan nahiyənin ürək səviyyəsindən bir qədər aşağıda saxlanılması tövsiyə olunur. Mütəxəssislər xəbərdarlıq edirlər ki, sancılan yerdən qanı sormaq, nahiyəni kəsmək və ya yandırmaq, turniket və ya buz qoymaq, yod, spirt və digər dezinfeksiyaedici vasitələr sürtmək olmaz. Eyni zamanda zərərçəkənə spirtli içki verilməsi də qadağandır. Mərkəz xüsusi olaraq qeyd edir ki, öldürülmüş ilan belə refleks nəticəsində bir saata qədər dişləyə bilər. Buna görə də ilanın daşınması zərurəti yaranarsa, onu möhkəm qutuya yerləşdirmək və əllə toxunmamaq lazımdır. Profilaktik tədbirlər çərçivəsində vətəndaşlara ilanların ola biləcəyi ərazilərdə uzun şalvar və hündürboğaz ayaqqabı geyinmək tövsiyə olunur. Gəzinti zamanı yerə çubuqla vuraraq səs yaratmaq da məsləhət görülür, çünki ilanlar adətən səs-küydən uzaqlaşırlar. Qurum vətəndaşları torpaq üzərindəki naməlum əşyalara və ya “rəngbərəng çubuqlara” toxunmamağa, ilanları qıcıqlandırmamağa çağırıb. Məlumata görə, Gürcüstanda ilanların aktiv mövsümü aprel ayından oktyabrın sonunadək davam edir. Onlar əsasən gecələr və ya havalar çox isinməzdən əvvəl gündüz saatlarında daha fəal olurlar. Mərkəz bildirir ki, Gürcüstanda gürzəkimilər fəsiləsinə aid dörd növ zəhərli ilan yayılıb. Onlardan ən təhlükəlisi Gürzə hesab olunur. Gürzə əsasən Şərqi Gürcüstanın yarımsəhra ərazilərində yaşayır. Həmçinin vurğulanır ki, yeni yumurtadan çıxmış ilanların zəhəri də yetkin ilanların zəhəri qədər təhlükəlidir.

www.24news.ge

DİQQƏT! İlan sancmaları ilə bağlı əhaliyə xəbərdarlıq edilib

Digər xəbərlər