მარნეულში, ერთ ერთ კლინიკაში სასტიკად ნაცემი დაცვის თანამშრომელი გარდაიცვალა

მარნეულის ქალაქში მდებარე „Geo Hospitals“-ის კლინიკაში მომხდარი ინციდენტის შედეგად მძიმედ დაშავებული ბოლნისის მუნიციპალიტეტის სოფელ მამხუტის მცხოვრები, 63 წლის ალადინ ყარანზადე გარდაიცვალა. 24News.ge-ის ინფორმაციით, გარდაცვლილის ახლობლების ცნობით, შემთხვევა 11 აპრილს კლინიკაში მოხდა. როგორც ამბობენ, ალადინ ყარანზადე ინციდენტის შემდეგ მძიმე მდგომარეობაში თბილისში მდებარე სამედიცინო დაწესებულებაში გადაიყვანეს და ამ დრომდე ხელოვნური სუნთქვის აპარატზე იყო მიერთებული და მკურნალობას გადიოდა. ოჯახის წევრების ინფორმაციით, შემთხვევა პაციენტის მონახულებასთან დაკავშირებით დაწყებული დაპირისპირების დროს მოხდა. მათივე თქმით, კლინიკის ვიზიტის საათების დასრულების შემდეგ დაცვის თანამშრომელმა პაციენტის ახლობლებს შენობაში შესვლის უფლება არ მისცა. ამის შემდეგ მხარეებს შორის სიტყვიერი დაპირისპირება დაიწყო, რაც მოგვიანებით ფიზიკურ ძალადობაში გადაიზარდა. არსებული ინფორმაციით, ალადინ ყარანზადე ლევან ხაფტანის მიერ იქნა ნაცემი და მიღებული მძიმე დაზიანებების გამო საავადმყოფოში გადაიყვანეს. მომხდართან დაკავშირებით 24News.ge-ს მიერ გაგზავნილი კითხვების საპასუხოდ შინაგან საქმეთა სამინისტრომ განაცხადა, რომ ფაქტზე ერთი პირია დაკავებული. შემთხვევასთან დაკავშირებით გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.

www.24news.ge

მარნეულში, ერთ ერთ კლინიკაში სასტიკად ნაცემი დაცვის თანამშრომელი გარდაიცვალა

სხვა სიახლეები