მარნეულში მიუსაფარ ცხოველთა ინტერმუნიციპალური თავშესაფარი აშენდება

მარნეულის მუნიციპალიტეტის მერმა დაურ ისმაილოვმა, პირველ მოადგილესთან გიორგი გოდაბრელიძესთან, სურსათის ეროვნული სააგენტოს ძაღლების ჰიპერპოპულაციის მართვის ცენტრის უფროსის მოადგილესთან ცირა ნაფეტვარიძესთან, ექსპერტთან ლაშა გეგეჭკორთან და სურსათის ეროვნული სააგენტოს ქვემო ქართლის რეგიონალური სამსახურის უფროსთან მირანგულა ლიპარტელიანთან ერთად პროექტის განხორციელების ეტაპები განიხილა. ხაზი გაესვა რეგიონში პრობლემის აღმოსაფხვრელად, უპატრონო და მიუსაფარ ცხოველთა ინტერმუნიციპალური თავშესაფრის აშენების მნიშვნელობასა და აუცილებლობას. საქართველოს მთავრობის გადაწყვეტილებით, ძაღლების ჰიპერპოპულაციის მართვის პროგრამის ფარგლებში, სურსათის ეროვნული სააგენტო რეგიონებში ცხოველთა თავშესაფრების მშენებლობას იწყებს. ქვემო ქართლის რეგიონში, თავშესაფრის მშენებლობის მიზნით, მარნეულის მუნიციპალიტეტის მერიამ სურსათის ეროვნულ სააგენტოს ყიზილაჯლოს ადმინისტრაციული ერთეულის ტერიტორიაზე მდებარე 9 917 კვ.მ. არასასოფლო-სამეურნეო დანიშნულების მიწის ნაკვეთი დროებით სარგებლობაში, 3 წლის ვადით გადასცა. პროექტის მიხედვით, კომპლექსში განთავსდება სხვადასხვა დანიშნულების შენობები, ზამთრისა და ზაფხულის საერთო განთავსების ვოლიერები, საკარანტინე ზონა, ადმინისტრაციული შენობა, ავტოპარკი, წყლის ბიოლოგიური გამწმენდი სისტემა და სხვა აუცილებელი ინფრასტრუქტურა. სურსათის ეროვნული სააგენტოს წარმომადგენლებმა შეხვედრაზე განმარტეს, რომ ობიექტზე დანერგილი იქნება სახიფათო ნარჩენების მართვის სპეციალური პროგრამა, როგორც ეს უკვე მოქმედებს კახეთისა და შიდა ქართლის რეგიონულ თავშესაფრებში. ასევე აღინიშნა, რომ ობიექტს არ ახასიათებს სპეციფიკური სუნი, ხოლო მისი მდებარეობა, თეთრიწყაროს მუნიციპალიტეტისკენ მიმავალ გზაზე, დასახლებული პუნქტებიდან რეკომენდირებულზე გაცილებით დიდი მანძილით არის დაშორებული. შეხვედრის ფარგლებში მონაწილეებმა ასევე დაათვალიერეს ტერიტორია, სადაც ინტერმუნიციპალური თავშესაფრის მშენებლობაა დაგეგმილი.

www.24news.ge

მარნეულში მიუსაფარ ცხოველთა ინტერმუნიციპალური თავშესაფარი აშენდება

სხვა სიახლეები