ცნობილი ხდება, რაზე შეთანხმდნენ აშშ და ირანი

აშშ-სა და ირანს შორის შეთანხმების მემორანდუმში არსებობს პუნქტი, რომლის მიხედვითაც ვაშინგტონი და თეირანი ვალდებულებას იღებენ, დაიცვან მშვიდობა და სტაბილურობა ახლო აღმოსავლეთში. 24News.ge-ს ინფორმაციით, ამის შესახებ აშშ-ის ვიცე-პრეზიდენტმა ჯეი დი ვენსმა განაცხადა. „მემორანდუმის პირველ პუნქტში რეალურად აღნიშნულია, რომ როგორც ირანი, ასევე აშშ რეგიონული მშვიდობისა და სტაბილურობის შენარჩუნების ერთგულები არიან“, - განაცხადა მან. ვიცე-პრეზიდენტის განცხადებით, შეთანხმება, სხვა საკითხებთან ერთად, ითვალისწინებს იმასაც, რომ ირანი შეწყვეტს მხარდაჭერას ისეთი დაჯგუფებების მიმართ, როგორიცაა „ჰამასი“ და „ჰეზბოლა“, ასევე ჰუსიტების მიმართ. ირანთან შეთანხმების მემორანდუმს აშშ-ის მხრიდან ხელი მოაწერეს პრეზიდენტმა დონალდ ტრამპმა და ვიცე-პრეზიდენტმა ჯეი დი ვენსმა, ხოლო თეირანის სახელით — ირანის პარლამენტის თავმჯდომარემ მოჰამად ბაქერ კალიბაფმა. კალიბაფმა კი სოციალურ ქსელ „X“-ის საკუთარ ანგარიშზე დაწერა: „ირანმა საბოლოო გამარჯვებისკენ დიდი ნაბიჯი გადადგა. ჩვენ მტკიცედ ვდგავართ და ღვთის დახმარებით გავიმარჯვებთ“. ირანის პრეზიდენტმა მასუდ ფეზეშქიანმა განაცხადა, რომ მოლაპარაკებების ჯგუფი არავითარ შემთხვევაში არ გადაუხვევს ხელმძღვანელობის მიერ განსაზღვრულ პოლიტიკას: „ყველა საქმიანობა განხორციელდება ეროვნული ინტერესებისა და სისტემის მიერ განსაზღვრული ხაზების ფარგლებში“. მანამდე მან აღნიშნა, რომ თუ აშშ-სა და ირანს შორის შეთანხმებული მემორანდუმის ყველა პუნქტი სწორად შესრულდება, თეირანს შეუძლია რეგიონში ახალი ვითარება შექმნას.

www.24news.ge

ცნობილი ხდება, რაზე შეთანხმდნენ აშშ და ირანი

სხვა სიახლეები