İran ABŞ ilə danışıqları dayandırıb və Şimali İsrail sakinlərini təxliyə etməyə çağırıb

İran İsrailin Livana davam edən zərbələrinə etiraz olaraq ABŞ ilə məlumat mübadiləsini dayandırır. 24News.ge xəbər verir ki, bu barədə "Tasnim"in teleqram kanalında bildirilir. Qeyd olunur ki, İran Hörmüz boğazının tam blokadasını planlaşdırır, eləcə də Bab əl-Məndəb boğazında əlavə tədbirlər görülməsi imkanını nəzərdən keçirir. Bundan başqa, İran Livan ətrafında gərginliyin artması fonunda baş verə biləcək hücum ərəfəsində İsrailin şimal bölgələrinin sakinlərini təxliyə olunmağa çağırıb. Bu barədə İranın "Xatəm əl-Ənbiya" Hərbi Komandanlığının Mərkəzi Qərargahının komandanı Əli Abdullahiyə istinadən "Tasnim" agentliyi xəbər verir. Onun sözlərinə görə, İsrail ordusu Livan ərazilərini bombalamağa davam edərsə, İran Silahlı Qüvvələri İsrailin şimal rayonlarına zərbə endirəcək. "Şimal rayonlarının və hərbi yaşayış məntəqələrinin sakinlərinə xəbərdarlıq edirik ki, zərər çəkmək istəmirlərsə, bu əraziləri tərk etməlidirlər", - deyə Abdullahi bildirib. ABŞ Prezidenti Donald Tramp isə İranla mesaj mübadiləsinin sürətli templərlə davam etdiyini bildirib. O bildirib ki, ABŞ və İran atəşkəs rejiminin uzadılmasını və Hörmüz boğazında gəmiçiliyin bərpasını nəzərdə tutan anlaşma memorandumunu müzakirə edirlər.

www.24news.ge

İran ABŞ ilə danışıqları dayandırıb və Şimali İsrail sakinlərini təxliyə etməyə çağırıb

Digər xəbərlər