Azərbaycan və Gürcüstan arasında hərbi əməkdaşlıq müzakirə olunub (FOTO)

Gürcüstanın baş nazirinin müavini, müdafiə naziri İrakli Çikovani ölkəmizdə səfərdə olan Azərbaycan Respublikasının müdafiə naziri Zakir Həsənov ilə görüş keçirib. 24News.ge xəbər verir ki, Gürcüstan Müdafiə Nazirliyində rəsmi qarşılanma mərasimi təşkil olunub. Daha sonra tərəflər ikitərəfli, regional və beynəlxalq əməkdaşlıq məsələlərini müzakirə ediblər. Nazirlərin təkbətək görüşündən sonra nümayəndə heyətləri arasında geniş tərkibli iclas keçirilib. Görüş zamanı İrakli Çikovani Azərbaycanın Gürcüstanın suverenliyi və ərazi bütövlüyünə göstərdiyi dəstəyə görə həmkarına təşəkkür edib və Gürcüstanın da Azərbaycanın suverenliyi və ərazi bütövlüyünü dəstəklədiyini bir daha təsdiqləyib. Tərəflər iki ölkə arasında strateji tərəfdaşlığın qarşılıqlı hörmət, etimad və mehriban qonşuluq prinsiplərinə əsaslandığını vurğulayıblar. Görüşdə Cənubi Qafqaz regionunda uzunmüddətli və sabit inkişafın əhəmiyyəti də qeyd olunub. Müzakirələr zamanı müdafiə sahəsində əməkdaşlıq planına uyğun məsələlər, o cümlədən hərbi təhsil, sosial və psixoloji dəstək, həmçinin çoxmillətli hərbi təlimlərdə birgə iştirak diqqət mərkəzində olub. Tərəflər Azərbaycan–Türkiyə–Gürcüstan üçtərəfli müdafiə əməkdaşlığı formatını da müzakirə ediblər. Bildirilib ki, üçtərəfli hərbi təlimlər ölkələr arasında əməkdaşlığı gücləndirir və qarşılıqlı uyğunlaşmanı artırır. Görüşdə Gürcüstan Müdafiə Qüvvələrinin Baş Qərargah rəisi Giorgi Matiaşvili və digər yüksək rütbəli hərbi rəsmilər də iştirak ediblər. Səfər çərçivəsində nümayəndə heyəti Tbilisi şəhərində yerləşən Qəhrəmanlar Memorialını və Heydər Əliyev adına mədəniyyət və istirahət parkında Ümummilli Liderin abidəsini ziyarət edib, abidələrin önünə əklillər qoyub.

www.24news.ge

Azərbaycan və Gürcüstan arasında hərbi əməkdaşlıq müzakirə olunub (FOTO)

Digər xəbərlər