Marneulidə Gürcüstan və Azərbaycanın Müstəqillik Günlərinə həsr olunmuş tədbir keçirilib (VİDEO)

Marneulidə “Azərbaycan Evi” və Gürcüstan Azərbaycanlılarının İnteqrasiya Mərkəzinin (GAİM) birgə təşəbbüsü və təşkilatçılığı, Diasporla İş üzrə Dövlət Komitəsinin dəstəyi ilə Gürcüstan və Azərbaycanın Müstəqillik Günlərinə həsr olunmuş “Qafqazın iki müstəqil səsi” adlı tədbir keçirilib. 24News.ge xəbər verir ki, tədbirdə Parlamentin deputatı Zaur Darğallı, Marneuli meri Daur İsmayılov, Dmanisi meri Koba Muradaşvili, Marneuli, Bolnisi və Dmanisi merlərinin müavinləri, Bütün Gürcüstan Müsəlmanları İdarəsinin müftisi Etibar Eminov, Marneuli meriyasının və bələdiyyə məclisinin struktur bölmələrinin rəhbərləri və üzvləri, Marneuli Təhsil Resurs Mərkəzinin əməkdaşları, Tbilisi və Kvemo Kartli bölgəsinin ictimaiyyət nümayəndələri, ziyalılar və gənclər iştirak ediblər. Tədbir Gürcüstan və Azərbaycanın dövlət himnlərinin səsləndirilməsi ilə başlayıb. Şəhla İsmayılova və Elvin Tağıyevin aparıcılığı ilə keçirilən tədbirdə çıxış edən “Azərbaycan Evi”nin və GAİM-in direktoru Məhəbbət İmanov bildirib ki, iki ölkənin müstəqillik günlərinin birlikdə qeyd olunması Azərbaycan və Gürcüstan arasında dostluq və strateji tərəfdaşlığın göstəricisidir. O, xalqlar arasında qarşılıqlı hörmət və ortaq dəyərlərin önəmini vurğulayıb. Gürcüstan Parlamentinin deputatı Zaur Darğallı çıxışında qeyd edib ki, 26 və 28 may tarixləri yalnız təqvim günləri deyil, azadlıq, milli kimlik və dövlətçilik iradəsinin simvoludur. Deputat vurğulayıb ki, Gürcüstan və Azərbaycan xalqları tarix boyu ortaq idealları bölüşüb, 1918-ci ildə müstəqilliklərini elan edib, 1991-ci ildə isə yenidən dövlət müstəqilliklərini bərpa edərək yeni inkişaf mərhələsinə qədəm qoyublar. Marneuli meri Daur İsmayılov çıxışında Gürcüstan və Azərbaycan xalqlarını Müstəqillik Günləri münasibətilə təbrik edib. O bildirib ki, bu əlamətdar tarixlər xalqların azadlıq, suverenlik və milli birlik uğrunda mübarizəsinin rəmzidir. Mer əlavə edib ki, Marneuli müxtəlif millətlərin nümayəndələrinin dostluq və qarşılıqlı hörmət şəraitində birgə yaşadığı məkan olaraq bu münasibətlərin nümunəsidir. Dmanisi meri Koba Muradaşvili isə çıxışında müstəqilliyin hər bir xalq üçün ən böyük sərvət olduğunu vurğulayaraq, Gürcüstan və Azərbaycanın inkişaf, sabitlik və rifah yolunda mühüm uğurlar əldə etdiyini bildirib. O, iki ölkə arasında strateji əməkdaşlığın regionda sülh və iqtisadi tərəqqiyə töhfə verdiyini qeyd edib. Bütün Gürcüstan Müsəlmanları İdarəsinin müftisi Etibar Eminov çıxışında xalqların çətin sınaqlardan keçərək dövlət müstəqilliklərini qoruduğunu və sabitlik yolunda mühüm nailiyyətlər əldə etdiyini bildirib. O, birlik, həmrəylik və qarşılıqlı hörmətin cəmiyyətin əsas dayaqları olduğunu qeyd edib. Tədbirin bədii hissəsində GAİM-in nəzdində fəaliyyət göstərən “Sarvan” folklor ansamblı tərəfindən Azərbaycan və gürcü milli rəqsləri — “Raculi” və “Yallı” təqdim olunub. Proqram çərçivəsində tanınmış solist Şaban Məmmədovun ifasında “İori” və Azərbaycan musiqiləri, İamze Jağelinin ifasında “Ey Vətən” və gürcü milli musiqiləri, Ramin Pirməmmədovun tarda ifasında “Arazbarı” və “Vətən yaxşıdır”, aşıq Nargilə Mehdiyevanın ifasında isə “Paşa köçdü” havası səsləndirilib.

www.24news.ge

Marneulidə Gürcüstan və Azərbaycanın Müstəqillik Günlərinə həsr olunmuş tədbir keçirilib (VİDEO)

Digər xəbərlər