Aİ səfiri: "Bizim tərəfimizdən Gürcüstanın üzvlük hüququ məsələsi bağlanıb, biz Gürcüstanı gözləyirik"

Avropa İttifaqının Gürcüstandakı səfiri Pavel Herçinski bildirib ki, Avropa İttifaqı Şurası və Avropa Şurasının qəbul etdiyi sənədlərdə namizəd ölkələrdən, o cümlədən Gürcüstandan gözlənilən addımlar aydın şəkildə göstərilib. 24News.ge xəbər verir ki, səfir bu barədə Avropa Gününə həsr olunmuş tədbirdə jurnalistlərə açıqlamasında danışıb. Onun sözlərinə görə, etiraz aksiyaları zamanı törədilmiş zorakılığa görə bir neçə polis əməkdaşının nəhayət saxlanılması düzgün istiqamətdə atılmış addımdır: “Ötən il dərc olunan hesabat, təəssüf ki, bunu deməliyəm, ağır idi. Hazırda noyabr ayında yayımlanacaq yeni genişlənmə hesabatı üzərində işləyirik. Həmin sənədlərdə Gürcüstanın Avropa inteqrasiyası yoluna qayıtması üçün hansı addımları atmasının gözlənildiyi açıq şəkildə qeyd olunub”. Jurnalistlərin Avropa İttifaqının gözləntiləri üçün konkret vaxt çərçivəsinin olub-olmaması ilə bağlı sualını cavablandıran səfir vurğulayıb ki, “hər şey Gürcüstanın əlindədir”. Herçinskinin sözlərinə görə, Avropa İttifaqı Gürcüstana namizəd statusunun verilməsi ilə bağlı qərarını artıq qəbul edib və bu, Aİ-nin 27 üzv ölkəsinin liderlərinin yekdil dəstəyi ilə mümkün olub: “Biz Gürcüstanı gözləyirik. Təəssüf ki, vaxt keçir və çox vaxt itirilir. Tanqonu isə iki nəfər oynayır. Artıq müəyyən müsbət addımlar var. Etirazlar zamanı zorakılıq törətmiş bir neçə polis əməkdaşının saxlanılması düzgün istiqamətdə atılmış addımdır. Cəzasızlıq qəbuledilməzdir. Biz zorakılığı bütün tərəflərdən pisləyirik”, – deyə o qeyd edib. Aİ səfiri əlavə edib ki, Avropa İttifaqına inteqrasiya aydın qaydalar, azadlıq, demokratiya, qanunun aliliyi və insan hüquqları prinsiplərinə əsaslanır və üzvlüyə can atan bütün ölkələr bu dəyərlərə riayət etməlidir.

www.24news.ge

Aİ səfiri: "Bizim tərəfimizdən Gürcüstanın üzvlük hüququ məsələsi bağlanıb, biz Gürcüstanı gözləyirik"

Digər xəbərlər