İyun ayında Gürcüstanda hansı dəyişikliklər qüvvəyə minir?

Bu gündən, 1 iyun tarixindən etibarən, Gürcüstanda bir neçə dəyişiklik qüvvəyə minir. 24News.ge yaxın günlərdə ölkədə qüvvəyə minəcək bütün yenilikləri bir yerə toplamağa çalışıb. Şəxsiyyət vəsiqəsinin dizaynı dəyişəcək: Ədliyyə nazirinin qərarına əsasən, Gürcüstan vətəndaşının şəxsiyyətini təsdiq edən vəsiqənin, həmçinin müvəqqəti və daimi yaşayış, müvəqqəti identifikasiya elektron vəsiqəsinin görünüşü dəyişəcək. Sənədə əsasən, bu qərar 4 iyun tarixindən qüvvəyə minəcək. Köhnə vəsiqələr – yəni yeni əmr qüvvəyə minənədək verilmiş vəsiqələr qanunvericiliklə müəyyən olunmuş müddətdə qüvvədə qalacaq. İrəvandan Batumi istiqamətində qatar reysləri başlayır – İrəvan-Tbilisi reysi ləğv olunur: İrəvan–Batumi–İrəvan sərnişin qatarı 14 iyun tarixindən fəaliyyətə başlayacaq. Bu qatar reysi ilə bağlı “Gürcüstan Dəmir Yolları” ASC ilə “Cənubi Qafqaz Dəmir Yolları” ASC arasında razılaşma imzalanıb. Razılaşmaya əsasən, qonşu ölkələr arasında sərnişin qatarları gün aşırı hərəkət edəcək və Gürcüstanda dəniz kurort mövsümünə uyğun olaraq 1 oktyabradək davam edəcək. Biometrik pasportun dizaynı dəyişir: Biometrik pasportun dizaynı dəyişdiriləcək. Bu barədə Ədliyyə nazirinin əmri ilə bildirilib. Sənədə əsasən, Gürcüstan vətəndaşının biometrik pasportu, diplomatik və xidməti biometrik pasportlar, Gürcüstanda statusu olan vətəndaşlığı olmayan şəxslərin və qaçqınların səyahət sənədlərinin texniki xüsusiyyətləri və formaları müəyyən olunub. Nazirin əmri 4 iyun tarixindən qüvvəyə minir və bu tarixdən etibarən vətəndaşlara yeni dizaynda pasportlar veriləcək. Sənədə əsasən, pasport blankı standart kitabça formatında, yuvarlaqlaşdırılmış künclərlə, cildi, 2 daxili səhifə, 36 kağız səhifə və 1 iki səhifədən ibarət polikarbonat elektron əlavədən (elektron məlumat səhifəsi) ibarət olacaq. Şəhərlərarası sərnişin daşınmasında dəyişikliklər: Avtovağzallar sertifikatlaşmaya hazırlaşır. 1 iyun 2025-ci ildən etibarən ölkədə fəaliyyət göstərən bütün avtovağzallar qanunla müəyyən edilmiş tələblərə cavab verməlidirlər. Yerüstü Nəqliyyat Agentliyindən bildirilib ki, hazırda ölkə üzrə 60-dan çox avtovağzal fəaliyyət göstərir və onlar sertifikat almağa hazırlaşır. Sertifikat almaq və texniki qaydalara uyğun infrastrukturu təmin etmək tələbi 1 iyun 2025-dən başlayaraq qüvvəyə minəcək. Amma bu müddət başa çatdıqdan sonra da avtovağzalların sertifikat alma imkanı olacaq. Bundan əlavə, planlaşdırılır ki, 2025-ci ilin 1 iyun tarixindən 150 km və daha uzaq məsafədə yerləşən şəhərlər arasında sərnişin daşınması yalnız avtobuslarla həyata keçiriləcək. İlk mərhələdə bu dəyişiklik Tbilisi, Kutaisi, Batumi, Zuqdidi və Telavi kimi böyük şəhərlərə şamil olunacaq. Bu gündən etibarən Gürcüstanda parlament tərəfindən qəbul edilmiş və "FARA" adı ilə tanınan qanun qüvvəyə minib: Qanuna əsasən, xarici mənbədən maliyyələşən və ictimai-siyasi fəaliyyət göstərən QHT-lər, media, şirkətlər və fiziki şəxslər "xarici agent" kimi qeydiyyatdan keçməlidirlər. Bu, həm birbaşa, həm dolayı xarici təsir və maliyyə alanlara aiddir. Qanun, reklam, məsləhətçilik, informasiya yayımı və digər təsiredici fəaliyyətləri də əhatə edir. Qanun tələblərinə əməl etməyənlər 10.000 lari cərimə və ya 5 ilə qədər azadlıqdan məhrum edilə bilər. Jurnalist və fiziki şəxslər də daxil olmaqla, hər kəs fəaliyyətinə dair materialları Korrupsiyaya Qarşı Mübarizə Bürosuna təqdim etməlidir. “Magti” bəzi mobil internet paketlərini bahalaşdırır: “MagtiCom” şirkəti bəzi limitsiz mobil internet paketlərinin qiymətlərini artırır. Şirkətin yaydığı məlumata görə, yeni tariflər 1 iyun tarixindən qüvvəyə minir. Tarif dəyişikliyi həftəlik və aylıq limitsiz internet paketlərinə şamil olunacaq. Müvafiq olaraq 3 lari artım olacaq.

www.24news.ge

İyun ayında Gürcüstanda hansı dəyişikliklər qüvvəyə minir?

Digər xəbərlər