Gürcüstan Müsəlmanları İdarəsinə yeni şeyx seçilib

Bu gün, 1 dekabr tarixində Bütün Gürcüstan Müsəlmanları İdarəsinin şeyx seçkisi ilə bağlı İdarənin Ali Dini Şurasının iclası baş tutub. 24News.ge xəbər verir ki, iclas zamanı əvvəlcədən də elan edildiyi kimi, GMİ-nin şeyx namizədlərinin səsvermə prosesi həyata keçirilib. Ali Dini Şuranın səs çoxluğu ilə, uzun illər Gürcüstanda bir sıra dini və ictimai xidmətləri olan Hacı Faiq Nəbiyev, Bütün Gürcüstan Müsəlmanları İdarəsinə (BGMİ) 5 il müddətliyinə şeyx seçilib. Qeyd edək ki, şeyx seçkilərində üç namizəd - Alulbeytin Gürcüstan üzrə rəhbəri Hacı Faiq Nəbiyev, tanınmış din xadimi Hacı Qurban Murquzov və İdarənin əməkdaşı Kərbəlayi Vidadi Qurbanov yer almışdır. Səsvermədə bölgələri təmsil edən Ali Dini Şuranın üzvləri 8 noyabr tarixində 3 rühaninin namizədliyini irəli sürmüşdür. Sözügedən şura bölgələrdən olan 21 nəfər rühanidən ibarətdir. Məlumat üçün bildirək ki, Hacı Faiq Teymur oğlu Nəbiyev 1977-ci ildə Marneuli Bələdiyyəsinin Sabirkənd kəndində anadan olub. O, Marneulinin 4 saylı orta məktəbini bitirib və ilk dini təhsilini Azərbaycanın Gəncə şəhərində “Gəncə Mədrəsəsi”ndə alıb. Daha sonra dini təhsilini İran İslam Respublikasının Qum şəhərində Dini Hövzə, həmçinin Beynəlxalq Əl-Mustafa Universitetində davam etdirib. O, vətənə qayıtdıqdan sonra Tbilisi Cümə məscidinin nəzdində təsis olunmuş “İmam Əli Mədrəsəsi”ndə müəllim, daha sonra müdir olaraq fəaliyyətə başlayıb. Hacı Faiq Nəbiyev 2002-ci ildə “Alul Beyt” Dini Mədəni Maarif Mərkəzi təsis olunduqdan sonra bu günə kimi sözügedən mərkəzdə müdir vəzifəsində çalışıb. O, bu illər ərzində "Alul Beyt" nəzdində böyük kitabxananın təsis edilməsində, azyaşlılar və yeniyetmələrin əxlaqi dəyərlər, həmçinin Dini təlimlərin təbliği məqsədi ilə gürcü və Azərbaycan dillərində nəşr olunan “Müctəba” jurnalını təsis edib. Fəaliyyəti illərində Marneulidəki İmam Hüseyn (ə) məscidi ilə yanaşı bir çox məscidlərin tikinti və təmirində, həmçinin ehtiyaclı ailələrə yardımların təşkilində böyük xidmətləri olub. Faiq Nəbiyev bundan başqa gənc və yeniyetmələrin ali məktəblərə qəbul olunması üçün dəstək verib. Belə ki, Hacı Faiqin təşəbbüsü ilə "Alul Beyt" Mərkəzində ümumilikdə 200-dən çox gəncin Dövlət Universitetlərinə qəbul olunması üçün hazırlıq kursları həyata keçirilib. Hacı Faiq Nəbiyev Gürcüstan ruhaniləri adından bir çox beynəlxalq tədbir və konfranslarda iştirak edib. Ərəb, fars və rus dillərini bilir. Evlidir, üç övladı var.

www.24news.ge

Gürcüstan Müsəlmanları İdarəsinə yeni şeyx seçilib

Digər xəbərlər